ԲՆ բնապահպանության և ընդերքի տեսչական մարմնի ստորաբաժանումների աշխատակիցների կողմից հոկտեմբերի 23-27-ն ընկած ժամանակահատվածում կատարված շրջայցերի, տեսչական մարմնին հանձնված վարչական վարույթի քննության, ինչպես նաև եռամսյակային հաշվետվությունների ընդունման գործընթացում հայտնաբերվել և արձանագրվել է թվով 31 իրավախախտում, որոնցից 17-ի վերաբերյալ անցկացվել է վարչական վարույթի քննություն և նշանակվել 980.000 դրամի վարչական տուգանք: Այս մասին հայտնում է բնապահպանության նախարարությունը:

Ընդհանուր առմամբ վերոնշյալ ժամանակահատվածում բնապահպանական իրավախախտման հետևանքով շրջակա միջավայրին հասցված վնասի չափը կազմել է՝ 41.408.900 դրամ:

Մասնավորապես` 

Բուսական աշխարհի պահպանության ոլորտ

Արձանագրվել է իրավախախտման 13 դեպք: Վերոնշյալ ժամանակահատվածում քննված վարչական վարույթներով նշանակվել է 150.000 ՀՀ դրամ տուգանք, հաշվարկվել 41.282.900 դրամ շրջակա միջավայրին պատճառված վնաս, որից՝

Լոռու տարածքային բաժնի աշխատակիցների ստուգայցերի արդյունքում և ՀՀ ոստիկանության գրությունների հիման վրա հայտնաբերված ապօրինի ծառահատման 7 դեպքի (հատել են 1 ցցաչոր խնձորենի, 3 սալորենի, 176 սոճենի և այլ տեսակների 408 ծառ) վերաբերյալ քննված վարչական իրավախախտման վարույթներով հաշվարկել է 41.003.300 դրամի շրջակա միջավայրին հասցված վնաս, ինչի մասին հաղորդում է ներկայացվել իրավապահ մարմիններին:

Տավուշի մարզում հայտնաբերված ապօրինի ծառահատման 1 դեպքի (հատվել է 1 ծառ) և փայտանյութի տեղափոխման 1 դեպքի (2,5 խմ փայտանյութ) վերաբերյալ հաշվարկվել է 153.000 դրամի շրջակա միջավայրին հասցված վնաս:

Կոտայքի մարզում հայտնաբերված ապօրինի ծառահատման և վառելափայտի ապօրինի տեղափոխման 2 դեպքի (3,5 խմ փայտանյութ) վերաբերյալ հաշվարկվել է 126.600 դրամի շրջակա միջավայրին հասցված վնաս և քննության արդյունքում նշանակվել է 150.000 դրամի վարչական տուգանք:

Երևանում հայտնաբերված ապօրինի ծառահատման 2 դեպքի վերաբերյալ գրություն է ներկայացվել Շենգավիթի ոստիկանություն՝ ծառահատների ինքնությունը պարզելու նպատակով:

Մթնոլորտային օդի պահպանության, թափոնների տեղաբաշխման, հողերի օգտագործման և պահպանման ոլորտ

Արձանագրվել է իրավախախտման 6 դեպք: Վերոհիշյալ ժամանակահատվածում քննված վարչական վարույթներով կայացվել է վարչական տուգանքի 6 որոշում՝ 330.000 դրամի, որից՝

Կոտայքի մարզում հայտնաբերված առանց անթափանց ծածկոցի ավազի տեղափոխման 1 դեպքի վերաբերյալ նշանակվել է 50.000 դրամի վարչական տուգանք, հողի բերրի շերտի ապօրինի տեղափոխման 1 դեպքի վերաբերյալ նշանակվել է 50.000 դրամի վարչական տուգանք: 
Արագածոտն՝ հայտնաբերված առանց անթափանց ծածկոցի ավազի տեղափոխման 2 դեպքի վերաբերյալ նշանակվել է 50.000-ական դրամի վարչական տուգանք, ընդհանուր՝ 100.000 դրամ:

Շիրակի մարզի հայտնաբերված առանց անթափանց ծածկոցի ավազի տեղափոխման 1 դեպքի վերաբերյալ նշանակվել է 50.000 դրամի վարչական տուգանք: Արմավիր՝ հայտնաբերված հողի օգտագործման և պահպանման, թափոնների գործածության օբյեկտների տեղադրման, նախագծման, շինարարության եւ շահագործման պահանջների խախտման 1 դեպքի վերաբերյալ նշանակվել է 80.000 դրամի չափով վարչական տուգանք:

Կենդանական աշխարհի պահպանության ոլորտ

Արձանագրվել է իրավախախտման 3 դեպք:

Վերոհիշյալ ժամանակահատվածում քննված վարչական վարույթներով կայացվել է վարչական տուգանքի 1 որոշում՝ 50.000 դրամի և հաշվարկվել է 15.000 դրամ շրջակա միջավայրին պատճառված վնաս, որից՝

Սյունիքի մարզում հայտնաբերվել և առգրավվել է ապօրինի որսված 3 հատ կարմրախայտ տեսակի ձուկ։ Հաշվարկվել է 15.000 դրամի շրջակա միջավայրին հասցված վնաս:

Գեղարքունիքի մարզում հայտնաբերվել է սիգ տեսակի ձկան ապօրինի որսի 1 դեպք (32 հատ՝ 10կգ), որն առգրավվել և հանձնվել է Վարդենիսի նյարդաբանական տուն ինտերնատին:

Արմավիրի մարզում հայտնաբերվել է խեցգետնի ապօրինի որսի 1 դեպք, որի վերաբերյալ նշանակվել է 50.000 դրամի վարչական տուգանք:

Բնապահպանական և բնօգտագործման վճարների եռամսյակային հաշվարկ-հաշվետվությունները սահմանված ժամկետում չներկայացնելու համար.

Կայացվել է վարչական տուգանքի 9 որոշում՝ 450.000 դրամի չափով, որից՝

Արմավիրի մարզի 4 տնտեսվարողների նկատմամբ նշանակվել է 50․000-ական դրամի չափով վարչական տուգանք, ընդամենը՝ 200.000 ՀՀ դրամ:

Արարատի մարզի 2 տնտեսվարողների նկատմամբ նշանակվել է 50․000-ական դրամի վարչական տուգանք, ընդամենը՝ 100.000 դրամ:

Շիրակի մարզի 1 տնտեսվարողի նկատմամբ նշանակվել է 50․000 դրամի վարչական տուգանք:

Կոտայքի մարզի 2 տնտեսվարողի նկատմամբ նշանակվել է 50․000-ական դրամի վարչական տուգանք, ընդամենը՝ 100.000 դրամ:

Ընթացքի մեջ գտնվող 22 իրավախախտումների վարչական վարույթի քննության արդյունքում նշանակվել է 2.030.000 դրամի վարչական տուգանք:

Ընդհանուր առմամբ նշված ժամանակահատվածում պետական բյուջե մուտքագրվել է 642.500 դրամ գումար: