![](/static/articles/83/72/l-bH7JRwhV25.jpg)
Ինչի՞ դիմաց է «ԱրմենՏելը» գումարներ գանձում
Ալավերդու Սանահին կայարանային թաղամասի մի խումբ բնակիչներ դիմել են «Հետքին»՝ խնդրելով բարձրաձայնել «ԱրմենՏել» ընկերության (ապրանքանիշը ապրանքանիշը` Beeline) կողմից մատուցվող ինտերնետայի կապի ցածրորակության մասին: Նրանք նշում են, որ լավագույն դեպքում ընկերությանն տրամադրած կապն ապահովում է մինչեւ 1.3 մեգաբիթ արագություն: «Իսկ ծանրաբեռնված դեպքում ընդհանրապես կապ չենք ունենում»,- դժգոհում է Սասուն Մատինյանը:
Նա նշում է, որ մինեւ «ԱրմենՏելի» հայտնվելը թաղամասը այլ մատակարարներից լավ թե վատ ինտերնետային ծառայություններ ստացել է: «Երբ «Բիլայնը» դուրս եկավ, իր ամպագորգոռ ռեկլամներով խոստանում էր էժան և բարձր արագությամբ կապ: Արդյունքում մեր պրովայդերները դուրս մնացին, իսկ «Բիլայնը» արդեն 1,5 տարի մեզ սպասեցնում է, թե տեսեք կաբելը քաշում ենք, կապը շուտով կլավանա»,- ասում է թաղամասի մեկ այլ բնակիչ եւ խնդրում իր անունը չհրապարակել:
Ըստ դժգոհողների՝ իրենք՝ 25 բնակիչներ, մոտ կես տարի է՝ ինտերնետայի կապի դիմաց «ԱրմենՏելին» վճարում են ամսական 15 հազար դրամ: «Այս վարձավճարով մենք 24-ժամյա կապ պետք է ունենանք, բայց կարող է 5 րոպե կապ ունենանք, 5 ժամ չունենանք»,- ասում է մեկ այլ բաժանորդ Համլետ Թամազյանը:
Սասուն Մատինյանը հայտնում է, որ թաղամասի 25 բաժանորդների անունից կապի ցածրորակությունը վերացնելու պահանջով դեռ նոյեմբերի 1-ին գրավոր դիմում են ուղարկել «ԱրմենՏելի» ղեկավարությանը:
«Մեր դիմումի համարը 12 663-ն է: Էսա 2 ամիս է՝ չեն պատասխանում: Անընդհատ զանգում ենք ընկերության տեխնիկական բաժնի պետ Սաշկովի ընդունարանի հեռախոսահամարով: Էնքան զանգել ենք՝ արդեն մեր զանգերին էլ չեն պատասխանում: Մեկ անգամ ասել են դիմումը քննարկման փուլում է, էսա երկու ամիս է՝ դիմունի քննարկումը չի ավարտում»,- հավելում է Սասուն Մատինյանը:
Այսօր բնակիչների նշած հեռախոսահամարով «Հետքի» զանգին պատասխանեց «ԱրմենՏելի» տեխնիկական բաժնի կոորդինատոր Զառա Չլթչյանը: Գրավոր դիմումի կապակցությամբ նա վստահեցրեց, որ բնակիչներին ընկերությունը պատասխանել է.
«Հարցը լուծվել է մասամբ: Ամբողջությամբ կլուծվի եղանակները լավանալուց հետ,- ասաց Չլթչյանը եւ հավելեց,- մենք գրավոր ենք պատասխանել, ամեն օր էլ պատասխանում ենք: Հեռախոսով իրենք ամեն օր էլ զանգում են»:
«Հետքը» փորձեց տեղեկություններ ստանալ նաև «ԱրմենՏելի» Ալավերդու բաժանմունքի գլխավոր մասնագետ Մելիք Ապրեսյանից:
«Սանահին կայարանային թաղամասից կրակն ենք մնացել, տարածությունը երկար է, արագություն չի ստացվում ապահովել»,- ասաց Մելիք Ապրեսյանը:
Մեկնաբանություններ (4)
Մեկնաբանել