Կառավարությանն առընթեր քաղաքաշինության պետական կոմիտեի մամուլի ծառայությունը տեղեկացնում է, որ կոմիտեում տեղի է ունեցել խորհրդակցություն՝ «Միկրոռեգիոնալ մակարդակի` համակցված տարածական պլանավորման փաստաթղթերի նախագծերի մշակման ծրագրի» իրականացման վերաբերյալ, որը վարել է Կոմիտեի նախագահ Նարեկ Սարգսյանը:

Խորհրդակցությանը մասնակցել են «Հայնախագիծ ԲԲԸ»-ի մասնագետները և քաղաքաշինության պետական կոմիտեի ներկայացուցիչները:

Հանդիպման ընթացքում քննարկվել է քաղաքաշինության պետական կոմիտեի պատվիրատվությամբ և համակարգմամբ՝ Տավուշի մարզի 55 համայնքների տարածքները ներառող 6 համակցված տարածական պլանավորման փաստաթղթերի մշակման գործընթացը, մասնավորապես` Տավուշ-2, Տավուշ-3, Տավուշ-4 և Տավուշ-6 չափաբաժիններով նախատեսված նախագծերը:

Նախագծերի հեղինակները ներկայացրել են իրականացված աշխատանքը՝ կատարված փոփոխություններով և ելակետային ճշգրտումներով՝ Տավուշի մարզի գյուղական և քաղաքային համայնքների համակցված տարածական պլանավորման փաստաթղթերը, տարածքի հեռանկարային զարգացման հատակագծերը, ճանապարհատրանսպորտային, արտադրական, պաշտպանական, անվտանգության ենթակառուցվածքների հենակետային հատակագծերը, առաջարկվող լուծումները և ներդրումային ծրագրերը՝ խնդրի առարկա համայնքներում գյուղատնտեսության և արդյունաբերության, բնակչության զբաղվածության խնդիրների լուծման, ինչպես նաև՝ կրթամշակութային, մարզաառողջարանային և զբոսաշրջային ուղղությունների զարգացման համատեքստում:

Ամփոփելով ծավալված քննարկումը Նարեկ Սարգսյանն անդրադարձել է կատարված աշխատանքներին՝ նշելով, որ այն ստրատեգիական նշանակություն ունի և շատ կարևոր է նաև Տավուշի սահմանամերձ գյուղերի համար: