Այսօր ԱՄՆ ուժերը Պակիստանում սպանել են «Ալ Քաիդայի» հիմնադիր առաջնորդ Օսամա Բին Լադենին: Համարվում է, որ նա 2001 թ. սեպտեմբերին 11-ին Առևտրի համաշխարհային կենտրոնում (Նյու Յորք) և Պենտագոնում (Վաշինգտոն) տեղի ունեցած ահաբեկչության կազմակերպիչն է:

Բին Լադենը սպանվել է մայրաքաղաք Իսլամաբադից դուրս գտնվող մի առանձնատանը: CNN-ի աղբյուրը հայտնել է, որ նրա մարմինը գտնվում է ԱՄՆ-ի ուժերի մոտ:

Այս պահին Սպիտակ տան մոտ հավաքվել են բազմաթիվ մարդիկ, որոնք տոնում են իրադարձությունը:

Քիչ առաջ հայտարարությամբ հանդես է եկել ԱՄՆ նախագահ Բարաք Օբաման, ով պաշտոնապես հայտարարել է, որ իր ղեկավարությամբ ԱՄՆ-ի ուժերի իրականացրած գործողության արդյունքում «Ալ Քաիդայի» ղեկավարը սպանվել է: Օբաման ասել է, որ Բին Լադենը պետք է «արդարադատության կանչվեր» այն տառապանքների համար, որոնք ամերիկացիները կրեցին 2001 թ. սեպտեմբերի 11-ի ահաբեկչության հետևանքով:

Բարաք Օբամայի խոսքերով` Բին Լադենը երկու տասնամյակ եղել է «Ալ Քաիդայի» ղեկավարն ու խորհրդանիշը, և ամերիկացիների համար կարևոր էր նրան չեզոքացնելը: Միաժամանակ Օբաման ամերիկացիներին կոչ է արել զգոն լինել` «Ալ Քաիդայի» կողմից նոր ահաբեկչություններից խուսափելու համար:

Օբաման ասել է, որ ԱՄՆ-ի պատերազմը իսլամի դեմ չէ, և շնորհակալություն հայտնել այն մարդկանց, ովքեր մասնակցել են Բին Լադենին ոչնչացնելու գործողությանը: Նա նշել է, որ իր թիմը խոսել է Պակիստանի նախագահի հետ, ով համաձայնել է, որ այս օրը պատմական է երկու երկրի համար: