«Հետք»-ի հոդվածի հիման վրա դատախազությունը տեղեկատվություն է պահանջել Արարատի մարզպետարանից
Նոյեմբերի 10-ին՝ «Լուծարում՝ տեղեկատվության հոսքը կանխելու համար. «Արարատ 2001» ԲՀԿ-ի հետ ինչ կապ ունեն Արարատի մարզպետները» վերնագրով նյութ էինք հրապարակել: Հոդվածում նշել էինք, որ Արարատի մարզում գործունեություն ծավալող և նախկին մարզպետներից Վարդգես Հովակիմյանի կողմից հիմնադրված «Արարատ-2001» բարեգործական ՀԿ-ն տարիներ շարունակ գումարներ է ստացել մարզի համայնքապետարաններից: Ավելին, չի ներկայացրել և ոչ մի հաշվետվություն՝ կատարած աշխատանքի և ծախսերի վերաբերյալ:
Պարզել էինք, որ «Արարատ-2001» բարեգործական ՀԿ-ն տեղակայված է Արարատի մարզպետարանի շենքում և սենյակն օգտագործում է անհատույց: Համայնքապետերը նշում էին, որ ՀԿ-ն գործում է մարզպետարանի ենթակայության տակ և մարզպետարանի հորդորով են գումարներ փոխանցել:
Երբ սկսեցինք ուսումնասիրել ՀԿ-ի գործունեությունը, թե´ Արարատի մարզպետարանը, թե´ «Արարատ-2001» ՀԿ-ն խուսափեցին տրամադրել ամբողջական տեղեկատվություն: Փոխարենը ՀԿ-ն սկսեց լուծարման գործընթաց:
Գլխավոր դատախազության հանրային կապերի բաժնից «Հետք»-ին տեղեկացրին, որ նոյեմբերի 17-ին Արարատի մարզպետից պահանջվել է համապատասխան տեղեկատվություն, սակայն դեռևս պատասխան չի ստացվել:
Գլխավոր դատախազությունից պատասխանեցին, որ ուսումնասիրության արդյունքների մասին կտրամադրվի լրացուցիչ տեղեկատվություն:
Մեկնաբանել