Այսօր Արմավիրի մարզի ընդհանուր իրավասության դատարանի Էջմիածնի նստավայրում քննվող քրեական գործի շրջանակներում ամբաստանյալի աթոռին նստած էր լրագրող Էլինա Խաչատուրովան:

Ըստ մեղադրական եզրակացության՝ լրագրողը, համագործակցելով «Մենք ու մենք» հասարակական քաղաքական, մշակութային, անկախ պարբերականի հետ, 2011թ. հուլիսի 9-ին զանգահարել է Արմավիրի մարզի Մերձավանի համայնքապետ Լևոն Գրիգորյանին, նրանք հարցազրույց անելու նպատակով պայմանավորվել են, և լրագրողը գնացել է նրա աշխատավայր:

Էլինայի հարցազրույցի թեման եղել է այն, որ իբր համայնքապետը համայնքի հողատարածքներից աճուրդային կարգով վաճառել է ՀՀ կառավարության անդամներին, իր իսկ նշանակած մարդկանց, իսկ շարքային գյուղացիներին չի թույլատրել աճուրդային կարգով գնել հողատարածքներ:

Մեղադրական եզրակացության մեջ գրված է նաև, որ հայցազրույցից հետո Էլինա Խաչատուրովան շրջել է գյուղի տարածքով, ուսումնասիրել աճուրդային կարգով վաճառված հողատարածքները, ծանոթացել մանկապարտեզի գործունեության պայմաններին: Հետո Լևոն Գրիգորյանն իր անձնական ավտոմեքենայով նրան ուղեկցել է Երևան՝ մամուլի շենքի մոտ, որտեղ էլ ավտոմեքենայի մեջ լրագրողը համայնքապետից պահանջել է գումար՝ դրական նյութեր հրապարակելու համար:

Լևոն Գրիգորյանն առաջարկել է 30.000 դրամ և հարցրել՝ գումարը կանխի՞կ պետք է տրվի, թե՞ բանկային փոխանցումով, որին Էլինա Խաչատուրովան հայտնել է, որ գումարը պետք է կանխիկ տրվի և հավելել է, որ առաջարկված գումարը շատ քիչ է:

Լևոն Գրիգորյանի առաջարկով պայմանավորվել են առաջիկա օրերին հանդիպել, որից հետո Էլինա Խաչատուրովան պարբերաբար զանգահարել է վերջինիս՝ գումարը ստանալու համար: Սակայն հեռախոսազրույցներից մեկի ժամանակ Լևոն Գրիգորյանը հայտնել է, որ գումարը կարող է փոխանցել միայն բանկային համակարգով, որից հետո Էլինա Խաչատուրովան զայրացած սպառնացել է, որ համայնքապետի գործունեության վերաբերյալ արատավորող տեղեկություններ կհրապարակի «Մենք ու մենք» պարբերականում:

Լևոն Գրիգորյանը, լսելով իրեն ուղղված սպառնալիքները, ՀՀ ԱԱԾ գրավոր հաղորդում է ներկայացրել վերոգրյալի վերաբերյալ: Հետո՝ 2011թ.հուլիսի 29-ին, իր աշխատասենյակում Էլինա Խաչատուրովան պահանջել է 50.000 ՀՀ դրամ և գումարը ստանալուց հետո բռնվել է ՀՀ ազգային անվտանգության ծառայության աշխատակիցների կողմից:

Էլինա Խաչատուրովային առաջադրվել է մեղադրանք՝ՀՀ քր.օրի 182 հոդվածի 1-ին մասով (Շորթում): Նրա նկատմամբ խափանման միջոց է ընտրվել չհեռանալու մասին ստորագրությունը:

Նախաքննության ընթացքում Էլինան չի ընդունել իրեն առաջադրված մեղադրանքը, սակայն այսօր դատարանում ամբողջությամբ ընդունեց: Նիստը նախագահող դատավոր Հրաչիկ Սարգսյանի այն հարցին, թե ինչու դատարանում ընդունեց մեղադրանքը, Էլինան պատասխանեց, որ նախաքննության ընթացքում զայրացած է եղել ինքն իր վրա, այդ իսկ պատճառով չի ընդունել, սակայն հետագայում զղջացել է իր կատարածի համար:

Ուշագրավ էր նաև այն, որ Էլինան դատարան էր ներկայացել առանց պաշտպանի: Սկզբում պատճառաբանեց, թե ֆինանսական վիճակից ելնելով՝ պաշտպան չունի: Երբ դատավորն ասաց, որ անվճար կարող է պաշտպան տրամադրել, Էլինան ասաց, թե պաշտպան չի ցանկանում ունենալ: Րոպեներ անց Էլինային ներկայացվեց, որ առանց պաշտպանի մասնակցության՝ գործը չի կարող քննվել արագացված ընթացակարգով, և Էլինա Խաչատուրովան ասաց, որ ցանկանում է պաշտպան ունենալ:

Նիստն ընդմիջվեց 10 րոպեով: 3 րոպեի ընթացքում դատական կարգադրիչները դահլիճ հրավիրեցին փաստաբան Թամարա Մալխասյանին: Հենց դահլիճում Էլինան ու փաստաբանը կնքեցին պայմանագիր, փաստաբանն այդ ընթացքում հասցրեց արագացված կարգով գործը քննելու մասին միջնորդություն գրել, որը դատարանը հետագայում բավարարեց: Փաստաբանը հայտարարեց, թե ծանոթացել է գործի նյութերին, և իրեն ժամանակ պետք չէ:

Մեղադրանքը պաշտպանում էր ՀՀ գլխավոր դատախազության ազգային անվտանգության մարմիններում գտնվող գործերով դատախազ Գրիգոր Տիգրանյանը: Նա հայտարարեց, թե մեղադրական ճառին պատրաստ չէ, և ողջամիտ ժամանակ խնդրեց: Նիստը հետաձգվեց մինչև հունվարի 23-ը: