Հատուկ քննչական ծառայության քննիչի վարույթ է ընդունվել արդարադատության նախարարության «Դատապարտյալների հիվանդանոց» քրեակատարողական հիմնարկի աշխատակցի կողմից հափշտակություն կատարելու փաստով քննչական կոմիտեում հարուցված քրեական գործը: Այս մասին տեղեկացնում է հատուկ քննչական ծառայությունը։

Այսպես, Ն. Նիկողոսյանը ոստիկանության Վաղարշապատի բաժնում հաղորդում է տվել, որ Ա. Ղազարյանը, գողություն կատարելու դիտավորությամբ, 2017 թվականի նոյեմբերի 10-ին իր ավտոմեքենայի սրահից գաղտնի վերցրել է իրեն պատկանող՝ Արմավիրի մարզի Փարաքար գյուղում գտնվող բնակարանի դռան բանալիները, ապա` ապօրինի մուտք է գործել նշված բնակարան և այնտեղից հափշտակել 1.200.000 դրամ, 1105 ԱՄՆ դոլար և 50 Եվրո՝ իրեն պատճառելով խոշոր չափի գույքային վնաս:

Դեպքի առթիվ քննչական կոմիտեի Արմավիրի մարզային քննչական վարչության Վաղարշապատի քննչական բաժնում 13.12.2017թ.-ին քրեական օրենսգրքի 177-րդ հոդվածի 3-րդ մասի 1.1 կետով հարուցվել է քրեական գործ, որի նախաքննության ընթացքում պարզվել է, որ Ա. Ղազարյանը մինչև 2017 թվականի դեկտեմբերի 8-ն աշխատել է արդարադատության նախարարության «Դատապարտյալների հիվանդանոց» քրեակատարողական հիմնարկի պահպանության ապահովման բաժնում:

Հաշվի առնելով, որ քրեական գործի նյութերում առկա են պետական հատուկ ծառայություն իրականացնող պաշտոնատար անձի կողմից կատարված առերևույթ հանցագործության հատկանիշներ, նշված քրեական գործը քննչական ենթակայության կարգով ընդունվել է հատուկ քննչական ծառայության վարույթ` հետագա նախաքննությունը շարունակելու համար:

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: