Թուրքիայի նախկին վարչապետ Մեսութ Յըլմազը խոստովանել է, որ Հունաստանի արևելյան շրջանի Էգեյան կղզիների և Մակեդոնիայի անտառային հրդեհների հեղինակները թուրքական գաղտնի գործակալություններն են եղել: Նա խոստովանել է, որ Թանսու Չիլերի վարչապետության ժամանակ՝ 1995-1997 թթ., թուրք գործակալները այրել են Հունաստանի անտառները: Այս մասին հայտնում է «Արաքս» շաբաթաթերթը՝ վկայակոչելով թուրքական «BirGun» թերթի տվյալները:

Յըլմազը ասել է, վարչապետներ Պապանդրեուի և Սիմիտիսի կառավարություններին չի հաջողվել այս մասին կոնկրետ տեղեկություններ ձեռք բերել:

«Բոլոր վարչապետները, երբ ավարտում են իրենց ժամանակաշրջանը, նոր վարչապետին տեղեկացնում են այն մասին, թե որտեղ և ինչպես են օգտագործել գաղտնի միջոցներ: Եվ ես ներկայացրել եմ իր հաջորդին, և ինձ իմ նախորդը արել է նույնը: Էրբաքանը, Էջևիթը և Դեմիրելը կատարել են նույնը: Միայն Չիլերը չի կատարել իր պարտավորությունը: Կա հատուկ հղում, որտեղ գաղտնի միջոցների բոլոր տեղեկությունները կարելի է ստանալ»,- ասել է Յըլմազը:

Հիշեցնենք, որ Հունաստանի անտառները 1995-1997թ. 12 անգամ ավելի շատ են այրվել այլ տարիների համեմատ:

Հունաստանի խորհրդարանական բոլոր կուսակցությունները դատապարտող հայտարարություններ են հրապարակել այս առնչությամբ, իսկ կառավարությունը պաշտոնական բողոք է ներկայացրել Անկարային և բացատրություն պահանջել: