Կառավարությունն այսօրվա նիստում ֆինանսների նախարար Վարդան Արամյանի առաջարկով որոշեց օֆշորային գոտիների երկրների ցանկում ավելացնել նաև Արևելյան կամ Ամերիկյան Սամոան, Թունիսը, Հարավային Կորեան, Մոնղոլիան, Նամիբիան ու Տրինիդադ և Տոբագոն:

Այդ երկրները այսուհետ կդիտարկվեն որպես Հայաստանի հարկային համակարգի համեմատ «ոչ խելամիտ» հարկման դրույքաչափեր կամ ազատական համակարգեր ունեցող երկրներ:

Նշենք, որ 2017 թվականի 1 հունիսի N 595-Ն որոշման համաձայն՝  Հարկային օրենսգրքի մի շարք հոդվածների հիման վրա կառավարությունը սահմանել է օֆշորային գոտիների (երկրների) ցանկը:

Այս երկրները կավելանան կառավարության 2017 թվականի հունիսի 1-ին ընդունած օֆշորային գոտիների երկրներ համարվող ցանկում և կառավարությունը լրացում կկատարի իր ընդունած որոշումում՝ այս երկրների անունները դրանում ևս ավելացնելով:

Ինչպես ասվում է կառավարություն ներկայացված որոշման նախագծում՝ 2017 թվականի դեկտեմբերի 21-ին Ազգային ժողովն ընդունել է «Հայաստանի Հանրապետության հարկային օրենսգրքում փոփոխություններ և լրացումներ կատարելու մասին» օրենքը և վերանայել հարկման տեսանկյունից Հայաստանի հարկային համակարգի համեմատ «ոչ խելամիտ» հարկման դրույքաչափեր կամ ազատական համակարգեր ունեցող երկրները` բնութագրելու նպատակով կիրառվող «օֆշորային գոտի» եզրույթը և անհրաժեշտություն գտել որոշումում փոփոխություն կատարել ու ավելացնել այս երկրները: Բացի այդ, Արևելյան կամ Ամերիկյան Սամոան, Թունիսը, Հարավային Կորեան, Մոնղոլիան, Նամիբիան ու Տրինիդադ և Տոբագոն Եվրամիության ընդունած «ոչ խելամիտ» հարկման դրույքաչափեր կամ ազատական համակարգեր ունեցող երկրներ են սկսել դիտարկվել:

լուսանկարը՝ novostipmr.com-ի