Կառավարությունը այսօրվա նիստին որոշեց «Թվային Հայաստան» հիմնադրամի կանոնադրական հիմնախնդիրների իրականացմանն աջակցելու նպատակով տրամադրել 50 միլիոն դրամ: Հավելենք, որ կառավարությունը հոկտեմբերի 19-ին ևս 39 միլիոն դրամ էր փոխանցել այս հիմնադրամին, կրկին կանոնադրական հիմնախնդիրների իրականացմանն աջակցելու նպատակով:

Գումարը կտրամադրվի կառավարության ֆոնդից: Այս որոշման նախագիծը գործադիրի նիստին ներկայացրել էր կառավարության աշխատակազմի ղեկավար Վահե Ստեփանյանը:

Ինչպես ասվում է կառավարություն ներկայացված որոշման նախագծում՝ «Թվային Հայաստան» հիմնադրամը մեկնարկել է Հայաստանի թվային փոխակերպման արդյունավետ իրականացման համար նախնական աշխատանքները:

Հիմնադրամը պետք է ավարտին հասցնի «Հայաստանի Թվային Օրակարգ 2030» երկարաժամկետ ռազմավարական փաստաթղթի մշակման աշխատանքները և սահմանված կարգով ներկայացնի հաստատման:

Այն պետք է կազմի պետական կառավարման համակարգի թվային փոխակերպման, ենթակառուցվածքների զարգացման, կիբեռանվտանգության, թվային հմտությունների զարգացման, մասնավոր հատվածի թվային փոխակերպման գործառույթները:

Որոշման նախագծի փոխանցմամբ՝ հիմնադրամի գործունեությունն ուղղված է պետական կառավարման մարմինների միջև փոխգործելիության և թվային փոխակերպման վերաբերյալ հանրային իրազեկվածության մակարդակի բարձրացմանը, ինչպես նաև պետք է մշակի և ներդնի էլեկտրոնային կառավարման և բջջային նույնականացման (Mobile ID) միասնական e-gov պորտալը, «Թվային Սփյուռք» ծրագրի նախագիծը: