Դեկտեմբերի 27-ին  իր  պաշտոնավարման 100 օրը լրանալու հետ կապված «Հետքի» հետ  հանդիպման ժամանակ Ալավերդու  քաղաքապետ  Արտավազդ Վարոսյանն  իր մտահոգությունը հայտնեց  հետեւյալ խնդրի վերաբերյալ: Մարզերի  առաջնահերթ  լուծում պահանջող խնդիրների լուծման նպատակով ՀՀ կառավարության ծրագրով Ալավերդի քաղաքին  հատկացվել է 100 մլն դրամ, սակայն 5 բարձրահարկ բնակելի շենքերի վերելակների վերանորոգման 12 մլն դրամը անարդյունավետ է ծախսվել:

Քաղաքի  Ս./Սարահարթի 1/6ա, 1/21, 1/22, Շահումյան 6, Էվոյան 1ա շենքերի վերելակների վերանորոգումից հետո  է  միայն պարզվել, որ  շենքերի բնակիչները պատրաստ չեն  սահմանված 15 հազար դրամ վարձը վճարելու: «Շենքերի մինչև 5-րդ հարկերի բնակիչները  հրաժարվում են վերելակների ծառայությունից, իսկ բարձր հարկերի բնակարանների մեծ մասի դռները փակ են, վերելակների շահագործման վարձավճարները մնացել են ավելի քիչ թվով բնակիչների վրա»,- ասաց քաղաքապետը:  Հենց այս պատճառով էլ Արտավազդ Վարոսյանը կառավարության 2-րդ  ծրագրով հատկացված գումարներից  բարձրահարկ շենքերի վերելակների վերանորոգում այլևս չի նախատեսել: «Անթույլատրելի է այսքան գումարները շռայլորեն ծախսել և մեկ տարի հետո տեսնել, որ այդ գումարները փոշիացվել են»,- ասաց նա: Քաղաքապետը փորձում է գտնել վերելակների շահագործման ելքը: Գտնվել է  ալավերդցի շահագործող, ում հավաստագրման հարցը լուծելուց հետո վերելակները բնակիչներին կսպասարկվեն 5 հազար դրամով, որը  նույնպես խնդիր է սոցիալապես անապահով շատ ալավերդցիների համար:

Դեկտեմբերի 27-ին «Հետքի» հարցմանը  Ս./Սարահարթ թաղամասի 1/6ա շենքի 4-րդ հարկի բնակիչ  Էմիլ Հարությունյանը և էլի բնակիչներ ասացին, որ  տեղյակ չեն իրենց շենքի վերելակների վերանորոգմանը:  Էմիլ Հարությունյանն ասաց, որ մեծ հաճույքով 5.000 դրամ վարձավճարով  իր ընտանիքը   կօգտվի  վերելակի ծառայությունից. «Մայրս ինֆարկտով հիվանդ է, գոնե վերելակով մեկ-մեկ բակ կիջնի»:

Այնուամենայնիվ, Արտավազդ Վարոսյանը   գտնում է, որ   2011 թ.-ը  Ալավերդի համայնքի   համար բարենպաստ տարի էր այն առումով, որ քաղաքի առաջնահերթ խնդիրների լուծման համար  կառավարության 1-ին և 2-րդ ծրագրերով   245 մլն դրամ է հատկացվել:   Կառավարության 1-ին ծրագրով  Ալավերդուն  հատկացվել է  100 մլն դրամ, իսկ  2-րդ  ծրագրով` 145 մլն դրամ: «Այս ծավալի աշխատանքներ համայնքային բյուջեն երբեք չէր կարող իրականացնել: Կապիտալ աշխատանքներն իրականցվում են մեր բյուջեի ֆոնդային մասով, որ մեր դեպքում շատ թույլ է»,- ասաց քաղաքապետը: Ըստ նրաս՝  կառավարության 1-ին  ծրագրով հատկացված 100 մլն դրամից 54 մլն դրամը  նպատակաուղղվել  է Ալավերդու 9 բազմաբնակարան շենքերի տանիքների վերանորոգման, 4,5 մլն դրամը՝  Ս./ Սարահարթ թաղամասի 2ա և 2բ շենքերի  բակերի խաղահրապարակների նորոգման, 12 մլն դրամը՝   բարձրահարկերի  վերելակների վերանորոգման և  29,2 մլն դրամը՝ քաղաքի  2500 քառ.մ ճանապարհների ասֆալտապատման համար:  Կառավարության  2-րդ ծրագրով  Ալավերդու առաջնահերթ խնդիրների լուծման նպատակով  հատկացված 145 մլն դրամից  65 մլն դրամը հատկացվել է  քաղաքի նոր աղբավայրի կառուցման համար, որի աշխատանքները ընթացքի մեջ են:  Փողոցների ասֆալտապատման համար հատկացվել է 30 մլն դրամ, 12 մլն դրամ է տրվել 5 բնակելի շենքերի տանիքների վերանորգման համար:

Ըստ Արտավազդ Վարոսյանի՝ այս  պահին 2-րդ ծրագրով տանիքների վերանորոգման աշխատանքներ են իրականացվում Սանահին կայարանային թաղամասի թիվ 2, թիվ  3,   Սայաթ-նովա 12 շենքերի տանիքների վրա:  Ս./Սարահարթի 2/6 5 հարկանի շենքի նախկինում հարթ տանիքը, որտեղ նույնպես կատարվում են աշխատանքներ,  վերանորոգումից հետո կդառնա թեք տանիք:  Քաղաքապետն  ասաց, որ ծրագրում «Հետքի» ահազանգի արդյունքներով ընդգրկված է նաև  քաղաքի Շահումյան թաղամասի 8 շենքի  տանիքի վերանորոգումը: Նախատեսված աշխատանքները իրականացնում   են  Ալավերդու «Տիտանյան եղբայրներ» ՍՊԸ-ն և  Վանաձորում գրանցված շինարարական այլ կազմակերպություններ: Ա. Վարոսյանը նաև նշեց, որ  երկու ծրագրերով  ասֆալտապատման նպատակով հատկացված 30-ական մլն դրամներից ներդրումներ են կատարվել  քաղաքի Փիրուզյան,  Էնգելս թաղամասից  դեպի  դպրոց տանող,  Շահումյան թաղամասի բարձրահարկ շենքերի մոտից մինչև քաղաքի ծննդատան շենքին հարող և Էնգելս թաղամասաից դեպի սեփական տներ գնացող ճանապարհների   ասֆալտապատման համար. «Եղանակային պայմաններից ելնելով՝  ասֆալտապատումը  կատարել ենք փոքր կտորներով»: 

Քաղաքապետը կարևորեց հատկապես իրակացվող տանիքների վերանորոգման աշխատանքները. «Տանիքը և շենքերի այլ տարածքներ համասեփականատիրական իրավունքով պատկանում է բնակիչներին, բայց քանի որ ստեղծված սոցիալական պայմաններում բնակիչները ի վիճակի չեն 10 մլն դրամ հավաքել և վերանորոգել իրենց սեփական տանիքը, պետությունը այդ կարևոր խնդրի լուծումը վերցրել է իր վրա: Այս դեպքում մենք պահանջում ենք, որ տանիքների վերանորոգման գործում  իր մասնակցությունը ունենա նաև բնակչությունը»:

Պաշտոնավարման  100-օրյա  աշխատանքների շրջանակներում «Հետքը» Արտավազդ Վարոսյանին հարց ուղղեց նաև համայնքի 2012 թ.-ի բյուջեի իր կանխատեսդումների մասին: «2012 թ.-ի բյուջեն 376 մլն դրամ է: Նախորդ տարվա համեմատ բյուջեն 64 մլն դրամով աճել է` ի հաշիվ բնապահպանական սուբվենցիաների ավելացման:  Ավելացել է նաև դոտացիան»:  Քաղաքապետարանի աշխատակազմի ծախսերը չեն ավելացել:  Քաղաքապետը հաստիքների ավելացում է նախատեսել քաղաքապետարանի ենթակառուցվածքներում, այդ թվում՝ մանկապարտեզներում նախատեսվել են բուժքրոջ հաստիքներ, ըմբշամարտի դպրոցում  տրվել են ըմբշամարտի պարապմունքի  լրացուցիչ ժամեր: Բյուջեի  ֆինանսավորմամբ  2012 թ.-ին քանդակագործության դասարան կբացվի գեղարվեստի դպրոցում: Համայնքի  2012 թ.-ի բյուջեն  բնակչության ակտիվ մասնակցությամբ հանրային քննարկման է ներկայացվել  Ալավերդու «Անկյուն+3» հեռուստաընկերության եթերում: Այդ քննարկումերի արդյունքներով  քաղաքապետի և  համայնքի ավագանու որոշմամբ 2012 թ.-ին նախատեսել են քաղաքապետարանի  բյուջետային հիմնարկների աշխատողների աշխատավարձի բարձրացում: