Հարգելի պարոն Նախագահ,

Վերջին տարիներին մեր երկրում ահագնացող չափերի են հասել բնության ավերումը, բնական ռեսուրսների անխնա շահագործումը եւ տնտեսության ոչ ռացիոնալ զարգացումը: Բնապահպանական խնդիրներն օր օրի ավելանում են, ինչն արդեն հարցականի տակ է դնում մեր երկրի եւ բնակչության ապագան: Չկա բնապահպանության որեւէ ոլորտ, որտեղ ճգնաժամային իրավիճակ չլինի.

1. հանքարդյունավերություն /Սոթք, Հրազդան, Աբովյան, Հանքավան, Թեղուտ, Քաջարանց, Սվարանց եւ այլն/,
2. Սեւանա լիճ /լճի աղտոտում, ձկնային պաշարների գրեթե իսպառ ոչնչացում, կենսաբազմազանության խաթարում եւ այլն/,
3. օդի աղտոտում /Երեւան, Ալավերդի, Արարատ եւ այլն/,
4. «օրինական» կամ անօրինական անտառահատումներ,
5. գետերի եւ ջրանցքների աղտոտում /աղետալի վիճակ բոլոր բնակավայրերի կոյուղու ցանցերում/,
6. կոշտ կենցաղային թափոնների անկանոն կառավարում /հանրապետությունում չկա գոնե մեկ, սանիտարական նորմերին համապատասխանող աղբավայր, բացակայում է կանոնավոր թափոնավերամշակումը/,
7. հողերի բերրի շերտի վնասում, ոչնչացում, աղտոտում եւ անապատացում /հանրապետության տարածքի 80%-ը ենթարկված է անապատացման,
8. բնապահպանության ոլորտի աշխատողների ցածր աշխատավարձեր /միայն նշենք, որ բնապահպանության նախարարությունում աշխատավարձերի բազային չափը մոտ 40 000 դրամ է/, որակյալ կադրերի հեռացում ու սիրողական մակարդակի աշխատողներով համալրում:

Այս շարքը կարելի է դեռ երկար շարունակել: Բայց այսպես այլեւս շարունակվել չի կարող: 
Որպես ՀՀ քաղաքացիներ, պահանջում ենք, որպեսզի Ձեր հանձնարարությամբ ՀՀ օրենսդիր և գործադիր իշխանություններն անհապաղ քայլեր ձեռնարկեն բնապահպանության ոլորտում ստեղծված իրավիճակը շտկելու ուղղությամբ և կատարեն համակարգային, հիմնարար փոփոխություններ`թե օրենսդրական, թե գործնական առումով:
Կարծում ենք, որ մենք ունենք բավարար ներուժ՝ թույլ չտալու, որ մեր երկրի հարստությունն անխնա շահագործվի և Հայաստանը վերածվի հանքահումքային կցորդի, այլ ունենա երկարատև ու բանական տնտեսական զարգացում:

Որպես իրավիճակի շտկման առաջին քայլ առաջարկում ենք, որպեսզի ՀՀ օրենսդիր և գործադիր իշխանությունները Ձեր հանձնարարությամբ.
• վերանայեն ՀՀ տնտեսության զարգացման ռազմավարական ուղղությունները՝ առաջնահերթություն տալով գիտատար եւ էկոլոգիապես անվտանգ ճյուղերի զարգացմանը,
• վերանայեն հանքարդյունաբերության ոլորտում տրված բոլոր տեսակի լիցենզիաները և քննարկեն դրանց արդյունավետությունը՝ երկրի տնտեսության բանական զարգացման ու էկոլոգիական անվտանգության տեսանկյունից,
• վերանայեն հանքարդյունաբերության ոլորտի հարկերի, տուրքերի եւ վճարների ողջ համակարգը, մասնավորապես հստակ սահմանեն հանքարդյունաբերական թափոն եւ պոչանք հասկացությունները համապատասխան օրենսդրական ակտերում, մասնավորապես ՀՀ Ընդերքի օրենսգրքում և ՀՀ օրենքում, եւ սահմանել բնապահպանական համապատասխան վճարներ՝ դրանց տեղակայման համար,
• խթանեն հանքանյութից վերջնական արտադրանքի ստացումը, այլ ոչ թե միայն խտանյութի արտահանումը,
• ավելացնեն Սեւանա լճի բնապահպանական խնդիրների լուծմանն ուղղված գործողությունները, մասնավորապես անհապաղ քայլեր ձեռնարկեն Սեւանա լիճ թափվող գետերի էկոլոգիական կայունությունն ապահովելու նպատակով,
• սահմանեն մորատորիում անտառներում բոլոր տեսակի հատումների /այդ թվում՝ սանիտարական/ համար՝ թույլ տալով միայն անտառամերձ բնակչությանը կատարել անտառի թափուկների եւ չորուկների հավաքում, միաժամանակ աշխատանքներ իրականացնեն անտառների վերականգնման, համայնքներում կանաչ գոտիների պահպանման, ընդլայնման եւ նորերի ստեղծման ուղղությամբ,
• ապահովեն -ի համապատասխան ֆինանսավորում՝ անտառների նորմալ պահպանությունն ու լայնամասշտաբ վերականգնումն իրականացնելու համար,
• խթանեն էկոլոգիապես մաքուր տրանսպորտային միջոցների /այդ թվում նաեւ հեծանվային/ արտադրությանը, ներկրմանը եւ օգտագործմանը,
• ընդունեն այնպիսի իրավական ակտեր և հաստատեն այնպիսի ծրագրեր, որոնք կնպաստեն կոշտ կենցաղային թափոնների հավաքման ու վերամշակման պարզ ու արդյունավետ համակարգերի ներդրմանը եւ այլն:

Մենք համոզված ենք, որ վերոնշյալ բարձրացված հարցերը պահանջում են պետական մոտեցում և լուծում, որը կարող ենք իրականացնել միայն Ձեր, որպես ՀՀ նախագահի, անմիջական միջամտությամբ ու աջակցությամբ:

Այսպիսով, ելնելով վերոշարադրյալից` ցանկանում ենք նաև անձամբ հանդիպել Ձեզ հետ, քննարկել վերը թվարկված և բնապահպանական ոլորտում ամենահրատապ լուծման ենթակա այլ հիմնախնդիրները եւ Ձեզ հետ միասին գտնել դրանց լուծման ուղիներն ու եղանակները: 

Ակնկալում ենք սեղմ ժամկետում ստանալ Ձեր դրական արձագանքը:

Հարգանքով և մեծ ակնկալիքով,
«Թռչկան» քաղաքացիական նախաձեռնություն