HY RU EN

Դիանա Ղազարյան

Դեղատոմսով դեղերը վաճառելու որոշման նախագիծը մասնակի կասեցվեց

Կառավարությունն այսօրվա նիստին առողջապահության փոխնախարար Սամվել Մարգարյանի առաջարկով՝ որոշեց մասնակի կասեցնել հակավարակային միջոցները, այդ թվում` հակաբիոտիկները, հորմոնալ և հսկվող նյութեր պարունակող դեղերը դեղատոմսով վաճառելու որոշումը։ Այսինքն՝ դեղատոմոսով վաճառվող 3500 դեղերի դուրսգրումը կիրականացվի փուլ առ փուլ՝ աստիճանական անցման ժամանակացույցով։

Փոխնախարարի փոխանցմամբ՝ հոգեմետ և հակաբիոտիկ դեղերը դեղատոմոսով կվաճառվեն մարտի 1-ից, իսկ հուլիսի 1-ից պարտադիր դեղատոմսի առկայությամբ կվաճառվեն բոլոր ներարկվող դեղերը, իսկ արդեն հոկտեմբերի 1-ից դեղատոմսով կիրացվի կառավարության հաստատած 3 500 անուն դեղերը։

Վարչապետը փոխնախարարին զգուշացրեց. «Պարոն Մարգարյան, խնդրում եմ՝ ուշադիր լինեք, ինֆորմացիա կա, որ արդեն էդ դեղատոմսերը դեղատների դեմը գրում, տալիս են, և դրա համար լրացուցիչ վճար կա։ Շատ ուշադի՛ր եղեք, որպեսզի բուտաֆորիա չդառնա դա»։

Նախարարությունը կառավարություն ներկայացրած որոշման նախագծում նշել է, որ որոշումն ընդունելուց հետո բնակչության և առողջապահության ոլորտի մասնագետների շրջանում առողջապահության նախարարության կողմից ձեռնարկված իրազեկման արշավների ընթացքում պարզ է դարձել, որ բոլոր դեղատոմսային դեղերի համար դեղատոմսով գնելու կիրառումը կառաջացնի որոշակի բարդություններ ինչպես բնակիչների, այնպես էլ բժիշկների և դեղատների աշխատակիցների համար: Ուստի նախարարությունը որոշել է մշակել աստիճանական անցման ժամանակացույց՝ հիմք ընդունելով առանձին դեղախմբերի ռիսկայնության աստիճանը:

Նախարարությունն առաջարկում է դեղատոմսային դեղերի դուրսգրման և դեղատնից դրանց բաց թողնելու կարգի աստիճանական ներդրման արդյունքում ապահովել ավելի մեղմ անցում, ինչի արդյունքում կնվազեցվի բնակչության հնարավոր անհարմարությունները և բժիշկների ծանրաբեռնվածությունը: