HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Նորամարգի ճանապարհները վերջին անգամ սովետական տարիներին են ասֆալտապատել

Նորամարգցիները չեն հիշում, թե վերջին անգամ երբ են իրենց գյուղի ճանապարհները վերանորոգված կամ ասֆալտապատված տեսել: Գյուղամիջում հավաքված նորամարգցիները կատակում էին, որ գյուղից «ողջ» ավտո դուրս չի գալիս, հյուր եկած ավտոն էլ գյուղ հետ չի վերադառնում:

Արարատի մարզի Նորամարգ համայնքի գյուղամիջի ճանապարհները անմխիթար վիճակում են. ասֆալտապատ ճանապարհ չկա, դրանց գրեթե ողջ երկայնքով էլ փոսեր են:

Ստեփան Բաբայանը բնակության համար այս գյուղ է տեղափոխվել երկու տարի առաջ: Ասում է՝ երբ անձրև է գալիս, փոսերն այնքան շատ են, որ վարորդները մեքենա չեն կարողանում վարել, դրանք ընկնում են փոսերն ու դուրս չեն գալիս: Նրա կողքին կանգնած մյուս հարևանն էլ շարունակում է Ստեփանի խոսքը՝ ցույց տալով փողոցն անցնող տղամարդուն ու ասում.« Նայի, էս մարդն ամեն խանութ գնալիս մի փոս է ընկնում, ոտքը ոլորում, բա էսպես կարելի՞ է»:

Նորամարգցիները հիմնականում օգտվում են Մասիս-Նորամարգ ավտոբուսից: Այս ուղղությունը սպասարկող ավտոբուսը ամիսներ առաջ թանկացրել է ուղևորավարձը՝ սակագինը 100 դրամից դարձնելով 150:

Թանկացման դեմ նորմարգցիներն ընդդիմացել են և փետրվարի 24-ին գյուղում բողոքի ակցիա արել, սակայն` անարդյունք. ուղևորավարձը չի նվազել: Նրանք ուղևորավարձի նվազման պահանջով անգամ ստորագրահավաք են կազմակերպել և ցուցակը փոխանցել տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանին: Նախարարությունից, սակայն, հայտնեցին, որ նախարարը Նորամարգից նման ստորագրահավաքի ցանկ չի ստացել:

Բենոն արդեն 20 տարի է՝ Մասիս-Նորամարգ ավտոբուսն է վարում: Ասում է.« Այդ տարիների ընթացքում այս գյուղի ճանապարհների վիճակը չի փոխել, միշտ էլ այս աստիճան անբարեկարգ է եղել: Մասիսի ավտոբուսը Նորամարգ ժամը մեկ է գալիս»: Մասիս-Նորամարգ ուղությունը սպասարկող ավտոբուսի վարորդ Բենոն ևս դժգոհ է ճանապարհների վիճակից: Ասում է՝ եթե ոչ օրը մեկ, ապա ավտոբուսն ամեն անգամ կայանելիս վերանորոգում է. «Ավտո չի դիմանում: Օր չկա՝ մենք մեքենա չջարդենք»:

Նորամարգցիները գյուղի խնդիրների մասին խոսելիս առաջին հերթին բարձրաձայնում են գյուղամիջի ճանապարհների վատ վիճակը: Նորամարգցիներին ամեն ընտրության ժամանակ խոստանում են, որ գյուղի ճանապարհները կասֆալտապատեն, սակայն անարդյունք:

Նորամարգի արդեն նախկին գյուղապետ Սարգիս Գալստյանը մեզ հետ զրույցում նշել էր, որ ճանապարհների ասֆալտապատումը առաջնահերթություն է, սակայն իրենց համայնքային բյուջեն քիչ է, չի բավարարում այդ աշխատանքների իրականացման համար: Գյուղապետը ճանապարհների հիմնանորոգման համար մինչ այժմ ֆինանսական օգնություն չի ստացել ո՛չ կառավարությունից, ո՛չ էլ մարզպետարանից:

Նորամարգի համայնքապետարանից մեր գրությանը ի պատասխան` հայտնել են, որ գյուղի ճանապարհները վերջին անգամ ասֆալտապատվել են 1991թ-ին՝ դեռևս ԽՍՀՄ-ի տարիներին: Ասֆալտապատման այդ աշխատանքները իրականացվել են պետական միջոցներով: Համայնքապետարանը չունի ճանապարհի հիմնանորոգման և ասֆալտապատման նախահաշիվ, սակայն նշում են, որ խիստ անհրաժեշտ է հիմնանորոգել 3.5 կմ երկարությամբ ճանապարհ:

Համայնքապետարանի փոխանցմամբ՝ գյուղի ճանապարհները կհիմնանորոգվեն, կասֆալտապատվեն անհրաժեշտ միջոցների՝ մասնավորի կամ պետական աջակցության առկայության դեպքում, և որ այս աշխատանքների իրականացումը մշտապես ընդգրկվել է համայնքի զարգացման ծրագրերում: Նորամարգի համայնքապետարանը բազմիցս դիմել է Արարատի մարզպետին, կառավարությանը, տրանսպորտի, կապի եւ տեղեկատվական տեխնոլոգիաների նախարարությանը, սակայն ստացել է հակիրճ պատասխան՝ ճանապարհների բարեկարգման ծրագիրը կիրականացվի համապատասխան միջոցների առկայության դեպքում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter