Պետության կողմից երաշխավորված անվճար և արտոնյալ պայմաններով բժշկական օգնություն և սպասարկում իրականացնող կազմակերպությունների էլեկտրոնային առողջապահության համակարգին միացման վճարները փոխհատուցելու նպատակով առողջապահության նախարարությանը հատկացվեց 203 միլոին դրամ։ Կառավարությունը նման որոշում կայացրեց այսօրվա հերթական նիստին և գումարը կփոխանցի իր պահուստային ֆոնդից։

Առողջապահության նախարարության փոխանցմամբ՝ էլեկտրոնային առողջապահության համակարգին միացման վճարները մասնակի կամ ամբողջությամբ կսուբսիադավորվեն: Սուբսիդավորում կկատարվի հետևյալ համամասնություններով՝

• Երևան քաղաքի 100 մլն դրամը գերազանցող շրջանառություն ունեցող բոլոր հիվանդանոցներին` 50%,  

• Երևանի քաղաքի 100 մլն դրամը չգերազանցող շրջանառություն ունեցող և մարզային բոլոր հիվանդանոցներին` 70%,

• սահմանամերձ և սահմանապահ հիվանդանոցներին, Երևանի և մարզային պոլիկլինիկակներին և գյուղական ամբուլատորիաներին` 100%: 

Նախարարությունը գործադիր բերված որոշման նախագծում նշել էր, որ 2018թ-ին այս ծառայության համար նախատեսված սուբսիդավորման ենթակա ընդհանուր գումարը կազմում է 487 միլիոն դրամ, սակայն առաջին 5 ամիսների համար անհրաժեշտ գումարը 203 միլիոն դրամ է։