HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Դատավորը զգուշացրեց, որ եթե Իշխան Բարսեղյանը չներկայանա նիստին, նրան նիստերի դահլիճից կհեռացնի

Կաշառք ստանալու մեջ մեղադրվող դատավոր Իշխան Բարսեղյանի գործը կարծես փակուղի է մտել: Փետրվարի 1-ից առ այսօր նշանակված բոլոր դատական նիստերը հետաձգվում են, քանի որ «Դատապարտյալների հիվանդանոցում» գտնվող Իշխան Բարսեղյանը չի ներկայանում դատարան: Վերջինս առողջական մի շարք խնդիրներ ունի: Արդեն մի քանի դատական նիստ է՝ դատարան գրություններ է ուղարկում ու հայտնում, որ ի վիճակի չէ ներկայանալ: Բարսեղյանը գրություններում հատուկ շեշտում է, որ ոչ թե ինքը չի ցանկանում ներկայանալ, այլ չի կարողանում: Հայտնում է նաև, որ ավարտական փուլում գտնվող իր գործի լուծման համար էական նշանակություն ունեցող միջնորդություններ պիտի ներկայացնի, ուստի խնդրում է հետաձգել դատական նիստը:

Այս նիստերը տեղի են ունենում շաբաթական մեկ անգամ, սակայն Բարսեղյանը միջնորդում է ոչ թե մեկ, այլ մի քանի շաբաթով հետաձգել դրանք:

Բարսեղյանի դիմում-միջնորդություններին կից դատարան է ուղարկվում նաև քրեակատարողական հիմնարկի գրություններն այն մասին, որ Բարսեղյանն առողջական խնդիրներ ունի, սակայն ինքնուրույն տեղարժվում և հոգում է կարիքները, ի վիճակի է տեղափոխվել դատարան: Սակայն գրություն այն մասին, որ առողջական ներկա խնդիրներով Բարսեղյանն ի վիճակի է մասնակցել դատական նիստին, առ այսօր ՔԿՀ-ից դատարան չի ներկայացվել:

ՔԿՀ-ից այսօր հերթական նույնաբովանդակ գրությունը և Բարսեղյանի հերթական դիմումն էր ուղարկվել: Դատարան հրավիրվեց ուղեկցող գումարտակի ոստիկանը, ում հանձնարարված էր Բարսեղյանին դատարան ներկայացնել, և հայտնեց, որ վերջինիս անձամբ չի տեսել, ՔԿՀ-ից հայտնել են, որ առողջական խնդիրներ ունի, ապա տվել այն գրությունները, որոնք ինքը դատարան է ներկայացրել:

Դատավոր Վաչե Մարգարյանն արձանագրեց, որ «Դատապարտյալների հիվանդանոց» քրեակատարողական հիմնարկից ստացված գրությունների համաձայն, փաստորեն, Իշխան Բարսեղյանն առնվազն դատարան ներկայանալ ի վիճակի է, սակայն չի ներկայանում, և այս հիմքով նրա նկատմամբ նկատողության տեսքով սանկցիա կիրառեց՝ նշելով, որ այն գրավոր տեսքով կուղարկվի Բարսեղյանին:

Դատավորը հայտարարեց նաև, որ եթե Իշխան Բարսեղյանը շարունակի չներկայանալ, ապա նրա նկատմամբ ավելի խիստ սանկցիա կկիրառի: Այսինքն՝ ստացվում է, որ Իշխան Բարսեղյանը, նիստերի դահլիճում չգտնվելով, կհեռացվի նիստերի դահլիճից:

Դատական պրակտիկայում, երբ ամբաստանյալներին դահլիճից հեռացնում են, պաշտպանների մի մասը դիրքորոշում է հայտնում, որ առանց պաշտպանյալի ներկայության չի կարող իրականացնել նրա պաշտպանությունը, քանի որ իր պաշտպանյալի կողմից լիազորված չէ այդպիսի գործողություն կատարել: Նման պայմաններում փաստաբանները լքում են նիստերի դահլիճը:

Դատավոր Վաչե Մարգարյանը պատկերացրեց նաև այս իրավիճակը՝ հայտարարելով, որ եթե նման բան լինի, և Բարսեղյանի պաշտպանները նրա բացակայությամբ չիրականացնեն պաշտպանություն, ապա գործում հանրային պաշտպաններ կներգրավի:

Նշենք նաև, որ նախորդ դատական նիստերից մեկի ժամանակ էլ դատավորը հայտարարել էր, թե առայժմ ձեռնպահ է մնում ամբաստանյալին բռնի ուժով դատարան բերելու գործընթացից:

Թե ի վերջո որ տարբերակով է Վաչե Մարգարյանն ապահովելու Իշխան Բարսեղյանի ներկայությունը նիստերին կամ առհասարակ կարողանալու է ապահովել, թե ոչ, առայժմ պարզ չէ:

Դատական նիստն այսօր ավարտվեց և հաջորդը նշանակվեց մարտի 22-ին:

Հիշեցնենք, որ Իշխան Բարսեղյանը մեղադրվում է կաշառք ստանալու մեջ: Վերջինս ձերբակալվել է 2016-ի հոկտեմբերի 27-ին՝ Ազգային անվտանգության ծառայության կողմից իրականացված օպերատիվ-հետախուզական միջոցառումների արդյունքում, ըստ ԱԱԾ-ի տարածած հաղորդագրության՝ ենթադրյալ կաշառք ստանալու պահին: Առաջադրված մեղադրանքի համաձայն՝ Բարսեղյանը, հանդիսանալով դատական իշխանության մարմնի ղեկավար աշխատող և մշտապես իշխանության ներկայացուցչի գործառույթներ իրականացնող պաշտոնատար անձ, քաղաքացի Նորիկ Հակոբյանի օգտին իր լիազորությունների շրջանակում գործողություններ կատարելու համար նրանից միջնորդի միջոցով պահանջել և անձամբ ստացել է խոշոր չափերով կաշառք:

Քրեական գործի շրջանակներում մեղադրանք է առաջադրվել նաև փաստաբան Էլզա Զաքարյանին: Վերջինս, ըստ մեղադրանքի, կաշառքի միջնորդություն է կատարել:

Բարսեղյանի լիազորությունները ժամանակավորապես կասեցվել են, ինչը նշանակում է, որ այս պահի դրությամբ Բարսեղյանը շարունակում է համարվել Երևան քաղաքի ընդհանուր իրավասության դատարանի դատավոր, վերջինիս աշխատավարձը շարունակում է փոխանցվել: Ավելին, վերջերս Շենգավիթ վարչական շրջանի ընդհանուր իրավասության դատարանը, որտեղ աշխատում էր Իշխան Բարսեղյանը, դարձել է քրեական գործերով դատարան: Ուստի Դատարանների նախագահների խորհրդի որոշմամբ՝ Շենգավիթի քաղաքացիական գործերով դատավոր Իշխան Բարսեղյանը տեղափոխվել է Քանաքեռի քաղաքացիական դատարան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter