Հայաստանի Հանրապետության նախագահ, Հայաստանի զինված ուժերի գերագույն գլխավոր հրամանատար Սերժ Սարգսյանն այսօր Ամանորի և Սուրբ ծննդյան տոների կապակցությամբ այցելել է մեր երկրի պաշտպանական դիրքեր:

Նախագահին ուղեկցել են Ամենայն Հայոց Կաթողիկոս Գարեգին Երկրորդը, ՀՀ պաշտպանության նախարար Սեյրան Օհանյանը:

Հանրապետության ղեկավարը հետևել է պաշտպանական հենակետերում մարտական հերթապահության կազմակերպմանը, ծանոթացել զինծառայողների սոցիալ-կենցաղային պայմաններին, զրուցել նրանց հետաքրքրող հարցերի շուրջ:

Սերժ Սարգսյանը շնորհավորել է հայոց բանակի զինծառայողներին գալիք տոների կապակցությամբ, հղել բարեմաղթանքներ և շնորհակալություն հայտնել անձնվեր ծառայության համար: «Ձեր կատարած գործն ամենակարևորն է մեր երկրի համար: Ամենակարևորը, որովհետև եթե դուք այստեղ ամուր չլինեք, վստահ չլինեք, մեր ժողովուրդն իրեն վստահ չի զգա, իսկ ձեր ամրությունը, ձեր ինքնավստահությունը փոխանցվում է այստեղից՝ այս սահմանից, որովհետև այստեղից է սկսվում մեր երկիրը»,-ասել է Նախագահ Սարգսյանը:

 Հանրապետության ղեկավարը նշել է, որ հայ զինվորը զսպաշապիկ է սահմանից այն կողմ կանգնած մարդկանց համար, որովհետև այնտեղ գիտեն, թե հայոց բանակի զինվորն ինչի է ունակ: Նախագահի խոսքով, հայ զինվորով հպարտանում են ոչ միայն իր ծնողները, այլև բոլորը՝ երեխաներից, երիտասարդներից սկսած մինչև մեծահասակներ: Ծառայության ընթացքում իրենց անձնվիրությամբ և խիզախությամբ աչքի ընկած մի խումբ զինվորներ Նախագահի կողմից ստացել են նվերներ:

Հանրապետության ղեկավարը նաև հանդիպել է սահմանամերձ Ոսկեպար և Կիրանց գյուղերի բնակիչների հետ, շնորհավորել նրանց գալիք տոների կապակցությամբ: Սերժ Սարգսյանը զրուցել է բնակիչներին հուզող հարցերի շուրջ, հետաքրքրվել սահմանամերձ բնակավայրերի խնդիրներով և տվել համապատասխան հանձնարարականներ: Այս մասին հայտնում է նախագահի մամլո գրասենյակը: