Հայաստանի պաշտպանության նախարարությունը նախատեսում է բացել նախարարության ենթակա ռազմաբժշկական հաստատությունների անվամբ արտաբյուջետային միջոցների մուտքերի և ծախսերի առանձնացված բանկային հաշիվ՝ բժշկական օգնության և սպասարկման վճարովի ծառայությունների դիմաց ստացվող վճարների մուտքագրման ու ծախսերի իրականացման նպատակով:

Այս մասին օրենսդրական նախաձեռնության առաջարկը հրապարակված է իրավական ակտերի հրապարակման միասնական E-draft.am կայքում:

Ըստ նախագծի՝ արտաբյուջետային միջոցները գոյանալու են պաշտպանության նախարարության ռազմաբժշկական հաստատությունների կողմից բժշկական օգնության և սպասարկման վճարովի ծառայությունների դիմաց վճարումներից:

Նշվում է, որ արտաբյուջետային հաշվի միջոցները տնօրինվելու են պաշտպանության նախարարի կողմից հաստատված նախահաշվին համապատասխան՝ բժշկական օգնություն և սպասարկում իրականացրած անձնակազմին խրախուսման ռազմաբժշկական հաստատությունների գործունեության ապահովման ուղղություններով:

Ինչ վերաբերում է ռազմաբժշկական հաստատությունների բժշկական օգնություն և սպասարկում իրականացրած անձնակազմին արտաբյուջետային միջոցներից խրախուսման չափերը նախատեսելուն, ապա այն իրականացվելու է պաշտպանության և առողջապահության նախարարների համատեղ հրամանով սահմանվող ռազմաբժշկական հաստատությունների կողմից քաղաքացիների բժշկական օգնության և սպասարկման վճարովի ծառայությունների մատուցման կարգով:

Որպես նախագծի հիմնավորում է նշվում նախարարության ենթակա ռազմաբժշկական հաստատությունների կողմից քաղաքացիներին պետության կողմից երաշխավորված անվճար և արտոնյալ պայմաններով, ինչպես նաև վճարովի բժշկական օգնության և սպասարկման ծառայությունների մատուցման գործընթացի պատշաճ կազմակերպումն ու իրականացումը: Այլ կերպ ասած՝ նախագծի ընդունման պարագայում ռազմաբժշկական հաստատությունների ծառայություններից կարող են օգտվել ոչ միայն այս կամ այն կերպ ՊՆ-ի հետ փոխկապակցված անձինք ու վերջիններիս հարազատները, այլև յուրաքանչյուր քաղաքացի:

Հիշեցնենք, որ նախագիծը դեռևս պետք է արժանանա կառավարության հավանությանը: