Նոյեմբերի 25-ին Լոս Անջելեսում տեղի է ունենալու «Հայաստան» Համահայկական Հիմնադրամի հեռուստամարաթոնը, որի նպատակն է շարունակել Լեռնային Ղարաբաղի Հանրապետության «Հյուսիս-Հարավ» ավտոմայրուղու շինարարությունը:

Ավտոճանապարհի կառուցումը սկսվել է 2000 թվականին, եւ մենք' բազմիցս առիթ ունենալով լինել Ղարաբաղում, տեսել ենք, թե ինչ հաջողություն ունի Արցախի համար կարեւորագույն նշանակություն ունեցող այս ծրագիրը:

Այն հատվածներում, որտեղ ճանապարհն արդեն կառուցված է, կյանքն էականորեն փոխվում է: Գուցե ոչ միանգամից եւ ոչ նյութական առումով, բայց, բնակչությանն ապագայի հույս տալով, ճանապարհը դառնում է սկիզբը տնտեսական ու սոցիալական նոր նախաձեռնությունների:

1996-99 թվականներին «Գորիս-Ստեփանակերտ», 2000-04 թվականներին «Հյուսիս-Հարավ» ավտոմայրուղիների շինարարությունն առիթ է եղել հայաստանյան, սփյուռքահայ եւ օտար ներդրումների: Մի բան, որ բացի կյանքի որակի վրա դրական ազդեցություն ունենալուց, նաեւ հույս է տալիս իր իրավունքների եւ ազատության համար պայքարող ղարաբաղցուն:

Մենք գիտենք, որ մեր ընթերցողին հետաքրքրում է Հայաստանի եւ Ղարաբաղի ապագան: Մեր հայրենակիցները հետաքրքրված են ժողովրդավարության, սոցիալական հավասարության հաստատմամբ, կաշառակերության, պետական չարաշահումների վերացմամբ եւ այլ կարեւոր խնդիրներով:

«Հետաքննող լրագրողներ» կազմակերպությունը իր ողջ գործունեության ընթացքում զբաղվել, զբաղվում եւ զբաղվելու է այդ խնդիրներով: Այսուհանդերձ մենք կարծում ենք, որ Հայաստանի, հատկապես, Ղարաբաղի վերականգնման ու զորացման գործը չպետք է կապել այդ իրողությունների հետ: Մենք չենք կարող ասել' նախ պայքարենք հանուն ժողովրդավարության կամ ընդդեմ բացասական երեւույթների, հետո նոր կառուցենք ճանապարհներ, ջրագծեր եւ կենսական նշանակություն ունեցող այլ ենթակառուցվածքներ: Մենք չենք կարող գործող իշխանությանը չսիրելու պատճառով երես թեքել ամբողջ ժողովրդից: Չենք կարող մի պարզ պատճառով, որովհետեւ այդ իշխանությունը որոշ ժամանակ անց հեռանալու է, եւ մենք տեսնելու ենք, որ մի քանի տարով անտեղի հետաձգել ենք գյուղերն ու շրջաններն իրար կապող ճանապարհի կառուցումը, որը վստահաբար պետք է Ղարաբաղի բնակիչներին:

Ի վերջո, մենք չենք կարող կրկնել արցախյան շարժման ձեռքբերումները, ընձեռնված ժամանակը օգտագործելու, Ղարաբաղի հերոս բնակչության սոցիալական վիճակը բարելավելու իշխանությունների անկարողությունը: Այլ հակառակը' պետք է մեր վարքով սովորեցնենք սիրել հայրենի երկիրն ու անել անկարելին:

Մեր թերթի ընթերցողներին առաջարկում ենք մասնակցել նոյեմբերի 25-ի հեռուստամարաթոնին եւ նպաստ բերել Ղարաբաղի «Հյուսիս-Հարավ» ավտոմայրուղու շինարարության գործին: