Երևանի ընդհանուր իրավասության դատարանի Կենտրոնի նստավայրում այսօր հերթական անգամ հետաձգվեց Աշխատանքի և սոցիալական հարցերի նախարարության պաշտոնյաների վերաբերյալ կաշառքի գործով դատական նիստը: Այս անգամ պատճառը նախագահող դատավոր Արմեն Բեկթաշյանի խորհրդակցական սենյակում գտնվելն էր։

Նշենք, որ կաշառքի վերաբերյալ այս գործը դատարան է ստացվել դեռևս 2017 թվականի սեպտեմբերին, 2017 թվականի հոկտեմբերին նշանակվել է առաջին նիստը, ու առ այսօր՝ 6 ամսվա ընթացքում նշանակված բոլոր նիստերից միայն մեկն է կայացել: Այս մեկ նիստի ընթացքում կալանքի տակ գտնվող ամբաստանյալ, բժշկասոցիալական փորձաքննության գործակալության պետ Արմեն Սողոյանի պաշտպան Հայկ Ալումյանը միջնորդել է փոխել իր պաշտպանյալի խափանման միջոց կալանավորումը, դատարանը, սակայն, մերժել է միջնորդությունը։

Արմեն Սողոյանը կալանքի տակ է գտնվում դեռևս 2016 թվականի դեկտեմբերից, իսկ մյուս ամբաստանյալների նկատմամբ ազատազրկման հետ կապ չունեցող խափանման միջոց է ընտրված:

Գործով ներգրավված է 13 ամբաստանյալ, իսկ դատական նիստերը մեծամասամբ հետաձգվել են տարբեր պատճառաբանություններով։

Նշենք, որ ըստ այս գործի նյութերի, Աշխատանքի և սոցիալական հարցերի նախարարության բժշկասոցիալական փորձաքննությունների տարածքային մի շարք հանձնաժողովների անդամներ, ի պաշտոնե լիազորված լինելով իրականացնել համապատասխան փորձաքննություններ, օրենքով նախատեսված հաշմանդամության խումբ որոշելու դիմաց քաղաքացիներից վերցրել են 20-ից 40 հազար դրամի չափով գումար: Այնուհետև, ապօրինի և համակարգային բնույթ կրող եղանակով գոյացած գումարները հանձնաժողովների նախագահները բաժանել են անդամների միջև, իսկ մի մասն էլ պարբերաբար հանձնել բժշկասոցիալական փորձաքննության գործակալության պետին:

Դեպքի առթիվ քրեական գործ է հարուցվել քրեական օրենսգրքի 311 հոդվածի 3-րդ մասի 2-րդ կետի հատկանիշներով (մի խումբ պաշտոնատար անձանց կողմից նախնական համաձայնությամբ կաշառք ստանալը):

Գործի շրջանակներում Արմեն Սողոյանին մեղադրանք է առաջադրվել այն բանի համար, որ «նա, զբաղեցնելով Աշխատանքի և սոցիալական հարցերի նախարարության աշխատակազմի բժշկասոցիալական փորձաքննության գործակալության պետի պաշտոնը, մշտապես իրականացնելով կազմակերպա-տնօրինչական, վարչատնտեսական գործառույթներ և հանդիսանալով պաշտոնատար անձ՝ աշխատասենյակներում ընդունել է գործով ամբաստանյալի կարգավիճակ ունեցող իրեն ենթակա բժշկասոցիալական փորձագիտական հանձնաժողովների նախագահներին ու մեկ միասնական դիտավորությամբ նրանցից ստացել առանձնապես խոշոր չափերով` ընդհանուր առմամբ 1,528,600 դրամին համարժեք կաշառք:

Երևանի թիվ 6 բժշկասոցիալական փորձաքննության հանձնաժողովի նախագահ Ժաննա Հովհաննիսյանը մեղադրում է Արմեն Սողոյանին որպես կաշառք 200,000 դրամ տալու մեջ:

Բժշկասոցիալական փորձաքննության գործակալության վերափորձաքննության բաժնի պետ Արամ Պողոսյանն, ըստ մեղադրանքի, Արմեն Սողոյանին 2016թ. դեկտեմբերի 23-ին տվել է 150,000 դրամ կաշառք:

Բժշկասոցիալական փորձաքննության հանձնաժողովի նախագահ Արոնա Սիմոնյանը մեղադրվում է Արմեն Սողոյանին 600 ԱՄՆ դոլար կաշառք տալու մեջ: Արարատի մարզի թիվ 2 բժշկասոցիալական փորձաքննության հանձնաժողովի նախագահ Զորիկ Մկրտչյանը մեղադրվում է 2016թ. նոյեմբերի 24-ին և 2016թ. դեկտեմբերի 23-ին Սողոյանի աշխատասենյակում վերջինիս որպես կաշառք համապատասխանաբար 40,000 և 100,000 դրամ տալու մեջ:

Շիրակի մարզի թիվ 3 բժշկասոցիալական փորձաքննության հանձնաժողովի նախագահ Երեմ Մարգարյանը, Սյունիքի մարզի թիվ 2 բժշկասոցիալական փորձաքննության հանձնաժողովի նախագահ Լիլիա Մանուցյանը, Երևանի թիվ 1 բժշկասոցիալական փորձաքննության հանձնաժողովի նախագահ Արմեն Ավետյանը, Կոտայքի մարզի բժշկասոցիալական փորձաքննության հանձնաժողովի նախագահ Ժիրայր Պետրոսյանը, Արմավիրի մարզի բժշկասոցիալական փորձաքննության հանձնաժողովի նախագահ Արշավիր Հմայակյանը, Արարատի մարզի թիվ 1 բժշկասոցիալական փորձաքննության հանձնաժողովի նախագահ Ալլա Թովմասյանը մեղադրվում են Սողոյանին 100,000-ական դրամ կաշառք տալու մեջ:

Երևան քաղաքի թիվ 6 բժշկասոցիալական փորձաքննության հանձնաժողովի բժիշկ-փորձագետ Շողիկ Ավետիսյանը մեղադրվում է Սողոյանին 265,000 դրամ կաշառք տալու մեջ:

Դատական հաջորդ նիստը տեղի կունենա ապրիլի 30-ին։

Գլխավոր լուսանկարում դատավոր Արմեն Բեկթաշյանն է