2018 թվականի պետական բյուջեի պահուստային ֆոնդից 93 միլիոն 838 հազար դրամ կհատկացվի Արդարադատության նախարարությանը՝ քրեակատարողական ծառայության ծառայողների ամսական լրավճարների վճարման նպատակով:

Նման որոշման նախագիծ այսօր հաստատվել է Կառավարության դռնփակ նիստում, այս հարցը  չզեկուցվող էր:

Որոշման նախագծում նշվում է, որ 2018-ի առաջին կիսամյակում հատկացվելու է 20 միլիոն 853 հազար դրամ, ինն ամսում՝ 52 միլիոն 132 հազար դրամ:

Ըստ Նախագծի արձանագրության՝ քրեակատարողական վարչության կրտսեր խմբի պաշտոն զբաղեցրած անձը վարձատրվում է սահմանված կարգով հաշվարկած պաշտոնային դրույքաչափի և 2014 թվականի առաջին կիսամյակի վարձատրության մակարդակը պահպանելու հնարավորություն տվող լրավճարի գումարով, որը 2-5 տարվա ծառայության ստաժ ունեցող քրեակատարողական կրտսեր մասնագետի համար կազմում է հաշվարկայինը` 157 հազար 939 դրամ, վճարայինը` 120 հազար 216 դրամ: Համաձայն նախարարության հիմնավորման՝ աշխատավարձի չափով պայմանավորված՝ քրեակատարողական ծառայության կրտսեր խմբի հաստիք զբաղեցնող ծառայողների հաստիքները հաճախ մնում են թափուր, ուստի նախատեսվում է այդ հաստիքները զբաղեցնող անձանց լրավճարները ավելացնել:  Տարեկան անհրաժեշտ է  125 միլիոն 116 հազար դրամ, նախագծով հատկացված գոմարը նախատեսված է 9 ամսվա համար` պահպանելով սահմանված լրավճարների սահմանաչափերը:

«Արդարադատության նախարարության քրեակատարողական ծառայության ծառայողների վարձատրության ավելացումը հնարավորություն կտա կարճ ժամանակում համալրել քրեակատարողական  ծառայության թափուր հաստիքները և նպաստել քրեակատարողական ծառայության արդյունավետ գործունեությանը»,-ասված է նախագծում: