2011թ. դեկտեմբերի 30-ից 2012թ. հունվարի 3-ն ընկած ժամանակահատվածում անհայտ անձը կտրել է Արարատի մարզի Սուրենավան գյուղական համայնքի բնակիչ Եղիշե Սեթյանին պատկանող 1 հա ծիրանի այգու ծառերը: Սուրենավանի համայնքապետ Կարո Կարապետյանը «Հետքի» հետ զրույցում ասաց, որ ընդհանուր առմամբ հատվել է 135 ծիրանի ծառ: Դեպքի առթիվ իրավապահ մարմինները նյութեր են նախապատրաստում:

Եղիշե Սեթյանն այժմ Հայաստանում չէ, և նրա հարազատները իրավապահ մարմիններին որպես կասկածյալ մատնանշել են Սուրենավանի նախկին համայնքապետ Վաչիկ Աղազարյանին:

Կարո Կարապետյանն ասաց, որ տուժողն ու նախկին գյուղապետը վատ հարաբերություններ ունեն, սակայն դժվարացավ հստակ ասել, որ հենց Վաչիկ Աղազարյանն է հատել ծառերը: «Հավանականություն կա, որ ինքն է, բայց դա իրավապահ մարմինները պիտի պարզեն, միգուցե ինքը չի»,- ավելացրեց Կ. Կարապետյանը:

Եղիշե Սեթյանի և Վաչիկ Աղազարյանի հարաբերությունները լարված են դեռևս 2008 թ.-ից: Եղիշե Սեթյանը համայնքապետի ընտրությունների ժամանակ սատարել է Կարո Կարապետյանին, ինչն էլ Վաչիկ Աղազարյանի անձնական թշնամանքն է առաջացրել: «Հենց այդ ժամանակվանից էլ նրանց հարաբերությունները լարվել են մինչև այսօր»,- ավելացրեց Կարո Կարապետյանը:

Նրա խոսքով՝ 20 տարի առաջ ևս գյուղում արձանագրվել է ծառեր հատելու դեպք, սակայն ոչ այս մասշտաբի: