«Ո՞վ է ասել, որ խաղատուն այցելողները պարտադիր խաղում են: Ես, օրինակ, չեմ խաղում: 4-5 անգամ եղել եմ Լաս-Վեգասում ու ոչ մի անգամ չեմ խաղացել», հայտարարել է պատգամավոր Վարդան Այվազյանը' ավելացնելով, թե այդ տրամաբանությամբ պետք է նաեւ բաղնիքները փակել, որովհետեւ «դրանց մասին էլ տարբեր բաներ են ասում»:

Թերթը մեջբերումից հետո այդպես է մեկնաբանել պատգամավորի խոսքերը. «Այն, որ Վարդան Այվազյանը մի քանի անգամ եղել է Լաս-Վեգասում, բայց չի խաղացել, անշուշտ' խոսում է նրա բացառիկ կամքի մասին: Այլ հարց է, որ հազիվ թե որեւէ մեկը հավատա այդօրինակ պնդումներին: Այ, եթե խոսքը բաղնիքների սաունաների մասին լիներ' հաստատ կհավատային, որովհետեւ սաունաների դեպքում այդ պնդումը միանգամայն ճիշտ է. Ո՞վ է ասել, որ սաունա այցելողները պարտադիր լողանում են: Ավելին' կարելի է վստահաբար պնդել, որ մեր բարձրաստիճան պաշտոնյաների մեծ մասը այդպես էլ անում է. Հաճախ է լինում սաունաներում, բայց չի լողանում:

Ինչ վերաբերում է կազինոներին, ապա կցանկանայինք ընդամենը մի հարց տալ ԱԺ պատգամավորներին: Եթե դրանք իսկապես վնասակար չեն եւ կարգին եկամուտներ են բերում բյուջեին, ինչո՞ւ են Երեւանից դուրս բերվել եւ ինչո՞ւ են կենտրոնացվում կոնկրետ բնակավայրերում»: