HY RU EN

Արաքս Մամուլյան

Լևոն Բարսեղյանին բերում են ՀՔԾ

Գյումրու Ժուռնալիստների «Ասպարեզ» ակումբ հասարակական կազմակերպության գործադիր տնօրեն Լևոն Բարսեղյանին ոստիկանները Գյումրուց բերման են ենթարկել։ Այս մասին «Հետք»-ին ասաց Բարսեղյանի փաստաբան Հայկուհի Հարությունյանը։ Փաստաբանը նշեց, որ իրեն հայտնի դարձած վերջին տեղեկությունների համաձայն՝ Լևոն Բարսեղյանը բերվում է Հատուկ քննչական ծառայություն։

Նշենք, որ ՀՔԾ-ում վերջին օրերին Հայաստանում տեղի ունեցող բողոքի ակցիաների առթիվ մի քանի քրեական գործ է հարուցվել և տեղի ունեցող գործողությունները որակվել են զանգվածային անկարգություն։ Այս դեպքի առթիվ հարուցված քրեական գործի շրջանակում է, որ Բարսեղյանը բերվում է ՀՔԾ։

Ապրիլի 13-ից Երևանում բողոքի ակցիաներ են սկսվել ընդդեմ Սերժ Սարգսյանի վարչապետության։ Ապրիլի 17-ին  Ազգային ժողովում Սերժ Սարգսյանի վարչապետ ընտրվելուց հետո «Իմ քայլը» շարժման նախաձեռնող, ԱԺ «Ելք» խմբակցության անդամ, «Քաղաքացիական պայմանագիր» կուսակցության վարչության անդամ Նիկոլ Փաշինյանը հայտարարեց թավշյա հեղափոխության մասին, որը պետք է իրականացվի ցանցային եղանակով` ցուցարարները ամեն օր ժամանակավորապես «գրավելու» են կառավարական շենքեր` այդտեղ աշխատողներին կոչ անելով միանալ շարժմանը, ժամանակավորապես խափանելու են մայրաքաղաքի կենտրոնական փողոցների երթևեկությունը, իսկ երեկոյան հանրահավաք են անելու Հանրապետության հրապարակում։