Ամանորից առաջ «Օրինաց երկիր» կուսակցության տարածքային գրասենյակները ՕԵԿ նախագահ Արթուր Բաղդասարյանի անունից մարզերում սննդամթերք են բաժանել: Մասնավորապես, Հրազդանում բաժանել են բնական հյութեր, իսկ Արմավիրի մարզի որոշ գյուղերում՝ տոպրակներ, որոնք մեջ եղել են 1 տուփ բնական հյութ, 2 տուփ սուրճ և 1 շիշ օղի:

ՕԵԿ-ականները Արթուր Բաղդասարյանի անունից պատրաստված բնական հյութի, սուրճի և օղու ամանորի «փաթեթներից» մեկն էլ ուղարկել էին լրագրողիս տուն:

Գյուղացիներից մեկը մեզ հետ զրույցում ասաց, որ օղին «թանկանոց չի եղել», սակայն ինքը վերցրել է՝ առաջնորդվելով «Շնից մազ պոկելն էլ օգուտ է» ասացվածքով:

Նշենք, որ նվերները տալուց առաջ քաղաքացիներից վերցրել են նրանց անձնագրային տվյալները: Շատերն արդեն պարտավորված են իրենց զգում՝ մտածելով, որ օղին խմել են և պետք է առաջիկա խորհրդարանական ընտրություններում իրենց քվեն տան «Օրինաց երկիր» կուսակցությանը:

ՕԵԿ մամուլի քարտուղար Սուսաննա Աբրահամյանը «Հետքի» հետ զրույցում ասաց, որ ՕԵԿ-ի անունից ամանորի նվերներ իրոք բաժանվել են ՕԵԿ անդամներին և համախոհներին: Հարցին, թե այդ դեպքում ինչու են իրենց կուսակիցներից անձնագրային տվյալներ վերցրել, մամուլի քարտուղարը պատասխանեց, թե նման բան չի եղել:

Ինչ վերաբերում է ոչ ՕԵԿ-ական ընտանիքիս անդամներին հյութ, օղի և սուրճ առաջարկելուն, Ս. Աբրահամյանը պատասխանեց, թե միգուցե նվերները, «սիմպատիայից» ելնելով, առաջարկել են նաև մեզ: «Չեմ կարծում, որ այդտեղ ինչ-որ վատ բան կա»,- ասաց ՕԵԿ մամուլի քարտուղարը:

Նա հավելեց, որ ՕԵԿ տարածքային գրասենյակները դիմել էին Երևանի կենտրոնական գրասենյակ, որպեսզի այն նվերներով ապահովի տարածքային գրասենյակներին: