HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ալավերդցիները փակել էին Ալավերդի–Վանաձոր միջպետական ճանապարհը և երկաթգիծը

Այսօր ժամը 12:30-ից ալավերդցիները Սանահին կայարանային թաղամասում փակել էին Ալավերդի–Վանաձոր միջպետական ճանապարհը և երկաթգիծը:

Ճանապարհի երկու կողմերում մարդատար և բեռնատար ավտոմեքենաների մեծ կուտակումներ էին: Մեր այցելության պահին Սանահինի երկաթուղային կայարանի երկաթգծի վրա նստած էին մի խումբ երեխաներ և երիտասարդներ: «Հարավ-կովկասյան երկաթուղի» ՓԲԸ-ին պատկանող 34-02 համարի Երևան-Այրում բեռնատար գնացքի մեքենավար Ալբերտ Բեժանյանը հայտնեց, որ ցուցարարների կողմից փակված երկաթուղային ճանապարհը հատելու էր ժամը 12:30-ին: Արդեն շուրջ մեկ ժամ է` գնացքը կանգնած էր  Սանահին երկաթուղային կայարանում: Մեքենավարի ասելով` Հարավ-կովկասյան երկաթուղու տնօրինությունը տեղեկացված է:

«Ցուցարարները այդ մասին մեր ղեկավարությանը տեղեկացրել են  երկաթգիծը փակելուց հետո: Մեր ղեկավարությունը հրահանգել է սպասել երկաթգիծը բացելուն»,- ասաց մեքենավարը: Երկաթուղու Սանահին կայարանի գծանցի սլաքավար Ռուբեն Բաղդասարյանի խոսքով` այսօր երկաթգծով ընդամենը մեկ բեռնատար գնացք է անցել դեպի Այրումի երկաթուղային կայարան. «Այս պահին մեկ բեռնատար գնացք կանգնած է Սանահինի երկաթուղային, երեք բեռնատար գնացքներ՝ Այրումի երկաթուղային կայարաններում: Օրվա ընթացքում Այրում-Երևան երթուղով պետք է անցնեն 5 բեռնատար գնացքներ»,- հայտնեց Ռուբենը:

Ալավերդի համայնքի ավագանու անդամ Սեյրան Հովհաննիսյանն ասաց, որ Ալավերդի – Վանաձոր միջպետական ճանապարհը երիտասարդությունը փակել է Նիկոլ Փաշինյանի հրահանգով. «Որպես Ալավերդի համայնքի ավագանու անդամ տեղյակ եմ, որ մինչև ժամը 16:00 պետք է փակված մնա միջպետական ճանապարհը: Ցուցարարները որոշել են ավելի երկար փակված պահել երկաթգիծը»:

Ցուցարար Վահե Մոսինյանի խոսքով` ալավերդցիները ցույցերին մասնակցում են ինքնաբուխ: «Մեր հետագա ծրագրերը դեռևս քննարկման փուլում են, բայց մեր ցույցերը դեռ շարունակական բնույթ են կրելու՝ մինչև վերջնական հաղթանակը: Դա կարող եմ փաստել»,- ասաց Վահեն:

Ժամը 16:00-ից բացվել է միջպետական ճանապարհը, սակայն երկաթգիծը դեռեւս փակ է: 

Մեկնաբանություններ (1)

Ռոբերտ Առաքելյան
Հարգարժան Տիկին Փարեմուզյան. Ձեր թղթակցության մէջ նշված չէ,թէ Ալավերդու բնակիչները ինչու են փակել միջպետական ճանապարհը։Այլ աղբյուրներից տեղեկացա,որ մարդիք հանդես են գալիս գործարանը վերաբացելու պահանջով։Ոչ անկախության ջատագով լինելս,ոչ էլ թավշյա հեղափոխությամբ խանդավառությունս չեն խանգարում հիշել՝ վստահ եմ,Ձեզ քաջածանոթ դեպքը,երբ ժամանակին նույնքան եռանդուն ցույցերի արդյունքում փակվեց գործարանը և դրա հետ կապված հանրահայտ երկխոսությունը գործարանի տնորեն Նորիկ Սարգսյանի ու ցուցարարների միջև։Եթէ չեք հիշում,օգնեմ։Երբ արդեն գործազուրկ տնորենը անցնում էր գործարանամերձ հրապարակով,անգործ զանգվածից հրճվանքով դիմեցին նրան,թէ."Ընկեր Սարգսյան,ծխի բացակայության արդյունքում տեսեք ոնց են կանաչել սարերը"։Իմաստուն ու հեռատես տնորենի պատասխանը շատ դիպուկ էր."Հա,կանաչել են,գնացեք արածեցեք"։Հիմա՞ ինչ են ուզում,արդյոք խո՞տն էր անհամ,,թէ՞ դա էլ վերջացավ։

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter