Բնապահպանության նախարարի ժամանակավոր պաշտոնակատար Էրիկ Գրիգորյանի մոտ տեղի է ունեցել աշխատանքային քննարկում 2018թ. սակավաջուր տարվա համար նախատեսված միջոցառումների վերաբերյալ։

Ինչպես տեղեկացնում է ԲՆ-ն, քննարկմանը մասնակցել են բնապահպանության, գյուղատնտեսության, արտակարգ իրավիճակների նախարարության, ԳԱԱ Սևանա լճի պահպանության փորձագիտական հանձնաժողովի, Էներգետիկ ենթակառուցվածքների և բնական պաշարների նախարարության Ջրային տնտեսության պետական կոմիտեի պատասխանատուներ և աշխատակիցներ։

Քննարկվող օրակարգային հարցերի շրջանակներում տրամադրվել է տեղեկատվություն Հայաստանի ջրամբարների լցվածության չափերի մասին և արձանագրվել, որ դրանք էականորեն զիջում են 2016 և 2017 թվականներին արձանագրված ծավալներին։ Պատասխանատու կառույցների ներկայացուցիչները ներկայացրել են ՀՀ կառավարության ընդունած որոշմամբ հաստատված՝ ոռոգման համար շարժական պոմպակայանների ձեռքբերման և հորերի հորատման աշխատանքների ընթացքը։

 Մատուցված տեղեկատվության հիման վրա դիտարկվել ու գնահատվել են այն ռիսկերը, որոնք կարող են առաջանալ սակավաջրության պատճառով և նախանշվել են դրանց դիմակայելու միջոցառումները։