Հատուկ քննչական ծառայության քննիչի վարույթ է ընդունվել տարբեր քաղաքացիների հաղորդումների հիման վրա Քրեական օրենսգրքի 309-րդ հոդվածի 2-րդ մասով հարուցված երկու քրեական գործ:

Մասնավորապես, հիշյալ քաղաքացիները հաղորդումներ ու բացատրություններ են տվել, որ 2018թ.-ի ապրիլի 13-ից ապրիլի 23-ն ընկած ժամանակահատվածում Երևան քաղաքի տարբեր փողոցներում կազմակերպված հավաքների ընթացքում ոստիկանության աշխատակիցները բռնություն են գործադրել իրենց նկատմամբ:

Ոստիկանության պետական ծառայություն իրականացնող պաշտոնատար անձանց կողմից բռնությամբ զուգորդված պաշտոնեական լիազորություններն անցնելու վերը նշված դեպքերի առթիվ հարուցված քրեական գործերը փաստական հանգամանքներով պայմանավորված, ինչպես նաև բազմակողմանի, լրիվ և օբյեկտիվ քննություն ապահովելու անհրաժեշտությունից ելնելով` միացվել են վերը հիշատակված պաշտոնատար անձանց նկատմամբ դեռևս ապրիլի 22-ին Հատուկ քննչական ծառայությունում Քրեական օրենսգրքի 164-րդ հոդվածի 3-րդ, 308-րդ հոդվածի 1-ին և  309-րդ հոդվածի 2-րդ մասերով հարուցված քրեական գործին:

Համաձայն հիշյալ քրեական գործի նյութերի` տվյալներ են ստացվել, որ Ոստիկանության և իրավապահ մարմինների այլ պաշտոնատար անձինք Երևան քաղաքի Բաղրամյան պողոտայից, Արցախի, Էրեբունու, Աբովյան և այլ փողոցներից ու վայրերից քաղաքացիներին հեռացնելիս  և բերման ենթարկելիս բռնություն են գործադրել նրանց նկատմամբ` պատճառելով մարմնական վնասվածքներ, կիրառել են հատուկ միջոցներ, սահմանված կարգի խատմամբ Ոստիկանության տարբեր ստորաբաժանումներ բերման են ենթարկել մի շարք քաղաքացիների, այդ թվում` լրագրողների ու փաստաբանների:

Ի դեպ, վերը նշված քրեական գործին միացվել է նաև Իրազեկ քաղաքացիների միավորում հասարակական կազմակերպության լրագրող Տիրայր Մուրադյանի հաղորդման հիման վրա Քրեական օրենսգրքի 164-րդ հոդվածի 3-րդ մասի հատկանիշներով հարուցված քրեական գործը:

Հատուկ  քննչական ծառայությունը տեղեկացնում է, որ նախաքննության ընթացքում արդեն տուժող են ճանաչվել փաստաբան Ավագ Լալայանը, լրագրող Տիրայր Մուրադյանը, Ազատություն ռադիոկայանի լրագրողներ Նաիրա Բուլղադարյանն ու Անատոլի Եղիազարյանը, ինչպես նաև 7 քաղաքացիներ:

Նախաքննությունը շարունակվում է: