HY RU EN

Դիանա Ղազարյան

Ավագանու «ԵԼՔ» խմբակցության անդամները միացան ցուցարարներին. վերջիններս փակել են փողոցը

Քիչ առաջ քաղաքապետարանի դիմաց հավաքված ցուցարարներին միացան նաեւ «Ելք» խմբակցության ավագանու որոշ անդամներ: Խմբակցության անդամները քաղաքապետարանի շենքից դուրս եկան խմբակցության ղեկավար Դավիթ Խաժակյանի գլխավորությամբ:

Ինչպես լրագրողներին հայտնեց Խաժակյանը, Տարոն Մարգարյանի հրաժարականի համար արդեն իսկ ուշ է, նա պետք է վաղուց հրաժարական տար՝ դեռ Սերժ Սարգսյանի հրաժարականից էլ առաջ:

Ասաց, որ այստեղ են՝ իրենց ընկերների կողքին, նույն պահանջով: Գործնական քայլերի մասով Խաժակյանը հստակ որևէ բան չասաց, նշեց, որ սպասում են իրենց խմբակցության որոշ անդամների, որպեսզի նիստ անեն, որից հետո ընդհանուր հայտարարությամբ հանդես կգան:

Դիտարկմանը, որ ՀՀԿ-ն ավագանու կազմում մեծամասնություն է, Խաժակյանը հակադարձեց, որ Ազգային ժողովում եւս նրանք մեծամասնություն էին:

Դավիթ Խաժակյանը չգիտեր՝ արդյոք Տարոն Մարգարյանը տեղյակ է ակցիայի մասին. ասաց, որ նրան այսօր չի տեսել:

Հավելենք, որ րոպեներ առաջ ցուցարարները փակեցին քաղաքապետարանի դիմացով անցնող Արգիշտի փողոցը՝ վանկարկելով «Տարոսը Տարոնին»:

Ցուցարարները փակեցին նաեւ Արգիշտի փողոցից Գրիգոր Լուսավորիչ տանող հատվածը:

Ցուցարարները այդպես էլ ականջալուր չեղան ճանապարհային ոստիկանության աշխատակցի հորդորներին եւ չբացեցին Արգիշտի փողոցը, որպեսզի երթեկությունը վերականգնվի: Մեքենաները ստիպված եղան շրջադարձ կատարել եւ վերադառնալ Արգիշտի փողոցով՝ այլ ուղղությամբ շարժվելու համար:

Հիշեցնենք, որ արդեն տեւական ժամանակ է՝ ցուցարարները փակ են պահում Երեւանի քաղաքապետարանի դինացի ճանապարհները՝ վարորդներին կոչ անելով միանալ իրեն պայքարին եւ պահանջել Տարոն Մարգարյանի հրաժարականը: Ցուցարարները վանկարկում են «Տարոնի վերջը եկել ա»: