Ազգային ժողովի պատգամավոր Լենա Նազարյանի կողմից ոստիկանության պետ Վալերիյ Օսիպյանին հասցեագրված դիմումին ոստիկանությունն արձագանքել է՝ հայտնելով, որ դրան արդեն իսկ տրվել է պարզաբանում մայիսի 12-ին՝ պաշտոնական www.police.am կայքում։

Հիշեցնենք, որ Լենա Նազարյանը Վալերիյ Օսիպյանին խնդրել էր պարզաբանել, թե ինչ փուլում է մայիսի 10-ին Բաղրամյան պողոտայում ցուցարարների վրա հարձակում գործած 17 JO 707 պետհամարանիշերով ավտոմեքենայի վարորդին առնչվող դեպքը:

«Հայտնում ենք, որ հիշյալ դիմումին արդեն իսկ տրվել է պարզաբանում 12.05.2018թ.՝ www.Police.am կայքում։ Մայիսի 10-ին, ժամը 21.00-ի սահմաններում, ոստիկանության Երևան քաղաքի վարչության օպերատիվ կառավարման կենտրոն քաղաքացիներից ահազանգեր են ստացվել, որ Բաղրամյան պողոտայի թիվ 75 հասցեի մոտ ոստիկան մոտենա: 

Մեկնած օպերատիվ խումբը պարզել է, որ նույն օրը, ժամը 21.00-ին, Բաղրամյան պողոտայի թիվ 75 հասցեի մոտ անցկացված բողոքի ակցիայի ընթացքում, անհայտ անձը մոտեցել է բողոքի ակցիայի մասնակիցներին ու դիտավորությամբ կոտրել, 1999թ. ծնված Համբարձում Մ.-ի բարձրախոսը՝ պատճառելով նյութական վնաս, և ձեռքով հարվածել է նրան, ապա բռունցքով հարվածել 1993 թ. ծնված Էդգար Վ.-ի դեմքին, ինչից հետո հեռացել է «Շեվրոլե Նիվա» մակնիշի ավտոմեքենայով, որը հայտնաբերվել և տեղափոխվել է Արաբկիրի բաժնի պահպանվող տարածք:

Նշանակվել է ԴԲՓ:

Ոստիկանության ծառայողների օպերատիվ-հետախուզական միջոցառումների շնորհիվ պարզվել է, որ անհայտ անձը 1973 թ. ծնված Ժորա Ռ.-ն է, որը բացատրական աշխատանքների շնորհիվ մայիսի 11-ին, ժամը 16.30-ին ներկայացել է բաժին և տվել բացատրություն:

Կատարվում է քննություն»,- գրված է ոստիկանության հաղորդագրության մեջ: