HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

«Աստված տա, լավ լինի, ես Ձեզ հետ կգամ Ձեր տղայի գերեզմանին». կուրսանտի սպանության գործով ցուցմունք տվեց գնդապետի մեղադրյալ որդին

2014 թվականի հունվարի 29-ին Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով ամբաստանյալ Գնել Թևոսյանը չի ընդունում իրեն առաջադրված մեղադրանքը: Երևան քաղաքի ընդհանուր իրավասության դատարանն այս գործով հասել է ամբաստանյալների հարցաքննության փուլին, և դատարանում այսօր այս գործով դատական նիստին առաջինը ցուցմունք տվեց Գնել Թևոսյանը: Վերջինիս հայրը՝ Զարմիկ Մարկոսյանը սպանության ժամանակ եղել է ռազմական ինստիտուտի պետի սպառազինությունների գծով տեղեկալը:

Այն բանից հետո, երբ որդին և երեք այլ ծառայակիցներ մեղադրվել են կուրսանտ Հայկազ Բարսեղյանի սպանության մեջ, գնդապետի կոչում ունեցած Մարկոսյանը հեռացվել է աշխատանքից: Վերջինին նույնպես մեղադրանք է առաջադրվել որդու համար զորամասում արտոնյալ պայմաններ ստեղծելու համար:

Այսօրվա դատական նիստին ցուցմունք տվող Գնել Թևոսյանը հայտարարեց, որ ռազմական ոստիկանությունում իր և գործով անցնող մյուս բոլոր անձանց՝  իր դեմ ցուցմունք տված վկաների, տուժողների նկատմամբ ռազմական ոստիկանությունում ճնշումներ են գործադրվել, որոնց պայմաններում նրանցից ոմանք իր վրա «շառ են արել»: Թևոսյանը, սակայն, իր պնդմամբ, հակված չէ նրանց մեղադրել, հասկանում է նրանց հոգեվիճակը:

Ըստ Գնել Թևոսյանի՝ ինքը հոգեպես ավելի ուժեղ է գտնվել ու իր նկատմամբ կիրառված ճնշման պայմաններում որևէ հանցանք չի փորձել բարդել մեկ այլ անձի վրա:

«Իմ դաստիարակությունն ինձ նման բան թույլ չի տվել: Ես կարողացել եմ ինքնախոստովանական ցուցմունք չտալ, բայց և մեղքն ուրիշի վրա չդնել»,- դատարանում հայտարարեց Գնել Թևոսյանը:

Վերջինիս ցուցմունքի համաձայն՝ ինքը սպանված Հայկազ Բարսեղյանի հետ նորմալ հարաբերություններ է ունեցել, Բարսեղյանին բնութագրեց իբրև «մարդկային մարդ», ասաց, որ Բարսեղյանն իրենից ավելի երկար է ծառայած եղել և նույնիսկ որոշ հարցերում նրանից խուրհուրդ է հարցրել, ու Հայկազն իրեն պատրաստակամորեն օգնել է:

Ինչ վերաբերում է սպանության հանգամանքներին, դրա վերաբերյալ Գնել Թևոսյանի հայտարարության համաձայն, ինքը ոչինչ չգիտի: Միայն հիշում է, թե ինչպես Հայկազ Բարսեղյանի դին պտտաձողից կախված վիճակում գտնելուց հետո բոլորը հակված էին մտածել, որ տեղի ունեցածն ինքնասպանություն է, և միայն այն բանից հետո, երբ պարզ է դարձել, որ ինքը ռազմական ինստիտուտի պետի՝ սպառազինությունների գծով տեղակալ Զարմիկ Մարկոսյանի որդին է, ինքնասպանությունը դարձել է սպանություն:

Գնել Թևսյանի խոսքով ՝ սպանության մասին ինքն իմացել է հունվարի 29-ի առավոտյան, իսկ դրան նախորդող գիշերը՝ ժամը 23:30-ի սահմաններում, գնացել է քնելու: 

Ըստ գործի նյութերի՝ սպանության գործով անցնող կուրսանտներ Վաչե Սահակյանը, Նորիկ Սահակյանը, Մովսես Ազարյանն ու Գնել Թևոսյանը զորամասում հավաքվել են ու նշել Վաչե Սահակյանի ծնունդը: Այս ժամանակ կուրսանտներն, ըստ գործի նյութերի, ալկոհոլ են օգտագործել: Գնել Թևոսյանը հայտարարեց, որ ինքն այդ օրը որևէ խնջույքի չի մասնակցել, որ սպանության գործով անցնող կուրսանտների հետ երբևէ մտերիմ հարաբերություններ չի ունեցել, որ նրանց հետ ծնունդ նշեր:

Նշենք, որ, ըստ գործի նյութերի, Գնել  Թևոսյանի, ինչպես նաև սպանության գործով անցնող մյուս ամբաստանյալների արյան փորձանմուշներում ալկոհոլ է հայտնաբերվել. Գնել Թևոսյանը  կտրականապես հրաժարվեց ընդունել այդ փորձաքննության պատասխանների իսկությունը` հայտարարելով, որ նման բան չի եղել:

Թևոսյանն ասաց նաև, որ ծառայության ութ ամիսների ընթացքում ավելի քիչ է ճանաչել սպանության գործով ամբաստանյալներին, քան այս երեք տարիների ընթացքում, երբ միասին բերվում են դատարան՝ Հայկազի սպանության գործի քննության համար:

Դեպքից հետո, ըստ գործի նյութերի, Գնել  Թևոսյանը կուրսանտ Հովիկ Հովհաննիսյանի միջոցով հորն ինչ-որ տոպրակ է փոխանցել: Դատավարության կողմերը հետաքրքրվեցին, թե դրանում ինչ է եղել: Գնել Թևոսյանը հայտարարեց, որ թեև ինքը գիտի, որ, ըստ գործի նյութերի, տոպրակում դանակ է եղել, դրանում եղել է ընդամենը իր քաղաքացիական հագուստը:

Ըստ Գնել Թևոսյանի՝ դեպքից հետո, երբ արդեն ակնհայտ է եղել, որ պատկան մարմինները գալու են զորամաս, կապիտան Ավետիսյանը հրահանգել է հավաքել ու աղբարկղը նետել կամ մեկ այլ տեղում պահել այն իրերը, որոնք, սահմանված կարգի համաձայն, կուրսանտները չէին ստացել Պաշտպանության նախարարությունից: Այլ կերպ ասած՝  խոսքը քաղաքացիական հագուստների, հեռախոսների և նմանատիպ այլ պարագաների մասին է: Ըստ Գնել Թևոսյանի` վերը նշված տոպրակում  քաղաքացիական, սև գույն ունեցող իր շապիկն է եղել:

Ինչպես արդեն նշեցինք, Գնել Թևոսյանի հայրը մեղադրվում է զորամասում որդու համար արտոնյալ պայմաններ ստեղծելու մեջ: Շատ զինծառայողներ ցուցմունքներ են տվել այն մասին, որ Զարմիկ Մարկոսյանի թողտվությամբ որդին` Գնել Թևոսյանը, հաճախակի է բացակայել զորամասից:

Թևոսյանը հայտարարեց, որ իր համար, որպես ռազմական ինստիտիուտի պետի տեղակալի որդու, ավելի բարդ է եղել ծառայելը, քանի որ ցանկացած խնդրի դեպքում իրեն բոլորը հիշեցրել են, որ հայրը բարձրաստիճան սպա է:

Թևոսյանը նշեց, որ ինքն ընդունելության քննությունները հանձնել է, ինչպես մյուս բոլոր կուրսանտները, սովորել՝  որքան կարողացել է, որ կարծել է, թե սովորեը հեշտ է, բայց շատ հարցերում դժվարացել է:

Գնել Թևոսյանը հայտարարեց նաև, որ երբ տարվել է ռազմական ոստիկանություն, պահանջել է, որ իրեն փաստաբան տրամադրեն, ինչը սկզբում չեն արել: Այդ ընթացքում, երբ դեռևս փաստաբան չի ունեցել, ըստ Գնել Թևոսյանի, իրեն առերեսել են սպանության գործով վկայի կարգավիճակ ունեցած անձանցից մեկի՝ Սամվել Սերոբյանի հետ: Վերջինս Հայկազ Բարսեղյանի սենյակում քնող կուրսանտներից է: Ըստ Գնել Թևոսյանի ցուցմունքի` թեև իրենց առերեսման հանգամանքը փաստաթղթերով արձանագրված չէ` Սերոբյանը բանավոր հայտարարել է, որ ինքը՝ Թևոսյանը, որևէ հանցավոր արարք չի կատարել:

«Դրանից հետո հանկարծ պարզում է, որ Սերոբյանն իմ դեմ ցուցմուքներ է տվել»,-հայտարարեց Գնել Թևոսյանը:

Նշենք, որ Սամվել Սերոբյանն այս գործով առանցքային վկա է, ում ներկայությանը, սակայն, դատարանում ապահովել հնարավոր չի եղել. վերջինս Հայաստանում չէ:

Երբ  ամբաստանյալին հարցեր ուղղելու հերթը հասավ սպանված Հայկազ Բարսեղյանի հորը` Արկադի Բարսեղյանին, վերջինս ավելի շատ երկխոսության մեջ մտավ ամբաստանյալի հետ, քան հարցեր ուղղեց նրան: Արկադի Բարսեղյանը պնդում էր, որ գործով վկաների նկատմամբ ճնշում չի եղել, որ Գնել Թևոսյանն արտոնյալ պայմաններում է ծառայել: Թևոսյանը, դիմելով  Արկադի Բարսեղյանին, ասաց, որ ինքը նրան վերաբերում է այնպես, ինչպես մյուս մարդկանց, մինչդեռ Արկադի Բարսեղյանն իրեն վերաբերում է իբրև թշնամու:

«Աստված տա` ամեն ինչ լավ լինի, և ես ձեզ հետ կգամ ձեր տղայի գերեզմանին»,- դիմելով Արկադի Բարսեղյանին` ասաց Գնել Թևոսյանը:

Վերջինս նշեց նաև, որ ինքը գնացել էր ռազմական ինստիտուտում սովորելու ու հայրենիքի պաշտպան դառնալու նպատակով, այլ ոչ թե քրեական հեղինակություն դառնալու համար: 

Դատարանը հաջորդ դատական նիստին կանդրադառնա Թևոսյանի նախաքննական  ցուցմունքները հրապարակելու կամ չհրապարակելու հանգամանքին. եթե դատաքննական ու նախաքննական ցուցմուքներում էական հակասություններ լինեն, ապա նախաքննական ցուցմունքները կհրապարակվեն:

Այսօրվա նիստը հետաձգվեց: Հաջորդը նշանակվեց հունիսի 4-ին:

Հիշեցնենք, որ Հայկազ Բարսեղյանը սպանվել է  2015-ի հունվարի 29-ին: Այդ օրն առավոտյան Հայկազ Բարսեղյանը հայտնաբերվել է ինստիտուտի բակում՝ պտտաձողից կախված: Սպանության համար  քննություն իրականացնող մարմինը մեղադրանք է առաջադրել Բարսեղյանի ծառայակից 4 կուրսանտի՝ Վաչե Սահակյանին, Մովսես Ազարյանին, Նորիկ Սահակյանին և Գնել Թևոսյանին: Ըստ մեղադրանքի` ամբաստանյալները Հայկազին սպանել են, ապա ինքնասպանության տպավորություն ստեղծելու համար նրան տարել ու կախել ինստիտուտի սպորտհրապարակից:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter