Լոռու մարզի փրկարար ծառայության վարչության պետ Հրաչ Անտոնյանը հունվարի 9-ին «Հետքին» հայտնեց, որ  2012թ.-ի անցած 8 օրերին  մարզում գրանցվել է հրդեհի 37 դեպք: Հրդեհվել է 1 տաղավար, 1 անասնագոմ, 2 բնակարան, 1 օժանդակ կառույց և 31 չոր խոտածածկույթ ու անտառ:

Հրաչ Անտոնյանը 8 օրվա ընթացքում գրանցված մարզի անտառների և խոտածածկույթի հրդեհների 31 դեպքն աննախադեպ վատ ցուցանիշ համարեց`  նախորդ տարվա ցուցանիշների համեմատ. «2011թ.-ին մարզում գրանցվել է  անտառային հրդեհների 45 և խոտածածկույթի հրդեհների 75 դեպքեր»,-ասաց նա:  Հ.Անտոնյանը պատրաստ չէր  տեղեկատվություն հաղորդել հրդեհների հետևանքով մարզի բուսական և կենդանական աշխարհին 2011թ.-ին  պատճառված  վնասների մասին, սակայն ասաց, որ հրդեհների հետևանքով միայն Տաշիրում 2011թ.-ին 300-350 հա անտառ է այրվել, սոճիներ են այրվել Օձունում: 

Հրդեհներից տուժել է նաև մարզի կենդանական աշխարհը: Կենդանիները փախչում են: Անցյալ տարի անտառային հրդեհների ժամանակ հրշեջները նկատել են իրենց ձագերի հետ այրված և սատկած ոզնիներ. «Սարերի հրդեհներից վերանում են նաև կաքավները»,- ասում է Հրաչ Անտոնյանը: 

Վերջինս կարծում  է, որ  անտառային և դաշտային հրդեհների համար պատասխանատվություն պետք է կրեն  անտառտնտեսությունները և համանյքները. «Էսօր մենք ստիպված գնում ենք, որ հրդեհը էդ տարածքներից հանկարծ չանցնի բնակավայրեր: Եվ այդ պահին հրդեհի մարելը միայն մեզ վրա է մնում»,- ասում է նա:  

Բնակավայրերում 2012 թ.-ի անցած օրերի ընթացքում գրանցված հրդեհներից ամենածանրը, ըստ  Հրաչ Անտոնյանի, Ալավերդիում հունվարի 5-ին Էնգելսի 6-րդ շենքի Ղիաս Բեժանյանին պատկանող բնակարանի պատշգամբում բռնկված հրդեհն էր: Փրկարարը գտնում էր, որ այս հրդեհի մարման գործում իր ենթակայությամբ աշխատող հրշեջները կատարել են հայրենանվեր ու հերոսական աշխատանք, որի հետ, սակայն, համաձայն չեն Ալավերդու բնակիչները: 

Թումանյանի տարածաշրջանի 31 համայնքերում հրշեջ ծառայություն են մատուցում  Ալավերդու հրշեջ ծառայությունը և վերջինիս Օձունի հենակետը: Այստեղ աշխատում է 24 հրշեջ, որից 9-ը աշխատում է Օձունի հենակետում, 15-ը` Ալավերդիում: 

Ծառայություններին կցված է մեկական հրշեջ ավտոմեքենա: Ավտոմեքենաները տեխնիկապես վերազինված չեն, կրում են ջրի նվազագույն պաշարներ: Այդ մեքենաներից հնարավոր չի լինում ջուր մղել հրդեհի ուղղությամբ: Վերջին շրջանում, հատկապես բնակարանային հրդեհների ժամանակ, Ալավերդիում հրշեջները մշտապես արժանանում են բնակիչների նախատինքին: 

Հունվարի 5-ին` առավոտյան ժամը 10:30-ի սահմաններում, Ալավերդու Էնգելս թաղամասի 6-րդ շենքի 4-րդ հարկի 22  բնակարանի պատշգամբում  բռնկված հրդեհը նույնպես այդ դեպքերից էր: 

Հրդեհն առաջացել է պատշգամբի լուսամուտից դուրս հանված փայտե վառարանի ծխատարից: «Տանիքի շիֆերի տակը տախտակ ա, տրուբեն կպել ա էդ տախտակին, ու հրդեհ ա բռնկվել»,- ասում է տանտեր Ղիաս Բեժանյանը: 

Նախորդ դարի 60-ական թվականներին կառուցված Էնգելսի 6 շենքի կոնստրուկցիաները հիմնականում փայտից են, այդ պատճառով էլ շենքը խիստ հրդեհավտանգ  է: 

Ըստ Էնգելս թաղամասի 6 շենքի բնակիչների` Ղիաս Բեժանյանի բնակարանի հրդեհը մարվել է 3, 5 ժամվա ընթացքում: Բնակիչները 10:30-ի սահմաններում հրդեհը նկատելուն պես զանգահարել են հրշեջ ծառայություն. «Հրշեջ ավտոմեքենան եկավ, բայց ոչ շլանգներ ունեին, ոչ էլ  ջուր ունեին կարգին: Շլանգները լրիվ պատռված ու տրաքած էին, եթե նորմալ մի հատ հրշեջ մեքենա լիներ, հարևան բնակարանին հրդեհը չէր հասնի»,- ասաց  Էնգելսի 6 շենքի բնակիչ Հովսեփ Յարալյանը: 

Բնակիչներն ասում են, որ եթե Վանաձորից հրշեջ ավտոմեքենա չժամաներ, շենքի ամբողջ տանիքը կայրվեր: Թե ինչու Վանաձորից ժամանած հրշեջներին հաջողվել է հրդեհը մարել, իսկ  ալավերդցի  հրշեջներին` ոչ, Հրաչ Անտոնյանը պատասխանեց. «Ասեմ, ուղղակի Երևանը Վանաձորից տարբերվում է, թե չէ:  Երևանը մայրաքաղաք է, այնտեղ պետք է լինեն առաջնային նորացված մեքենաներ: Նույնն էլ Վանաձորը.  համեմատած մարզի համայնքների հետ»: 

Համայնքներում հրշեջ ծառայությունների տեխնիկայի հնամաշությունը Հրաչ Անտոնյանը գաղտնիք չհամարեց. «Դրանք 25-30 տարվա մեքենաներ են,  նախկինում այդ մեքենաները շահագործման ենթակա չեն եղել, բայց մենք   հնարավորություն չունենք նոր մեքենաներ հատկացնելու, չունենք: Ավտոմեքենաները կապիտալ վերանորոգման ենթարկելն ավելի թանկ է, քան նորը ձեռք բերելը»: 

Պարզվեց, որ արդեն մի քանի օր է` Ալավերդու հրշեջ ծառայությունը չունի  պետ. «Այսօր մենք հարմար թեկնածու ենք փնտրում»,- ասաց Անտոնյանը: Այդուհանդերձ,  փրկարար ծառայության վարչության պետը մեզ հետ ողջ զրույցի ընթացքում  անվերջ կրկնում էր, որ հրշեջները հերոսական աշխատանք են կատարում: «Ո՞րն է նրանց հերոսական աշխատանքը, երբ չեն կարողանում մարել ամենափոքր հրդեհը»,-հարցրինք պարոն Անտոնյանին:

«Ոնց չեն կարողանում, եթե հրշեջները չհասնեին շենքի ամբողջ տանիքը կնստեր»,- պատասխանեց նա: 

Վերջինս անտեսում էր այն կարևոր հանգամանքը, որ հրդեհված Էնգելսի 6 շենքից ընդամենը 200 մետր հեռավորության վրա գտնվող  հրշեջ ծառայության ավելի օպերատիվ աշխատանքի  դեպքում հրդեհը չէր  տարածվի հարևան բնակարանի վրա և սոցիալապես անապահով Անահիտ Անտոնյանի ընտանիքին չէր պատճառի նյութական մեծ վնասներ:

«Ուղղակի մեր հրշեջ ավտոմեքենայի ջրի պարունակությունը քիչ է: Ասենք` այնտեղ 5 րոպեում  ջուրը  փչում  է ու պրծնում է: Ու նորից պետք է գնա, վերալիցքավորի,  դրա հետ կապված էսօր հիդրատներ չունենք, որ, ասենք, փողոցում կանգնացնենք, շլանգները միացնենք, գնա,  հազար ու մի խնդիրներ կան»,-խոստովանեց Հրաչ Անտոնյանը:  

Իսկ հրդեհը չի սպասել վերալիցքավորման գնացած  հրշեջ ավտոմեքենաների  վերադարձին: Հ. Անտոնյանից  նաև տեղեկացանք, որ Ալավերդու և Օձունի հրշեջ ծառայությունների  հրշեջ  ավտոմեքենաները կրում են 2տ 150 լ ջուր, իսկ  Վանաձորինը` 4 տ ջուր: 

Բոլոր դեպքերում,  Հրաչ Անտոնյանը դրական էր համարում, որ Էնգելսի 6 շենքում  երկու բնակարան է վառվել. «Էտենց բան չկա, որ նման շենքերում հրդեհ բռնկվի ու շենքը չնստի»,- ասում է  Լոռու  մարզի փրկարար ծառայության վարչության պետը: