![](/static/articles/89/86/l-ER0GmuZn7C.jpg)
«Հրապարակ». ծեծել են ոստիկանի
Երեկ երեկոյան կրակոցներ են հնչել Շիրակի մարզի Արթիկ քաղաքում։ Կրակոցներին նախորդել է դաժան ծեծկռտուքը, ընդ որում՝ մասնակիցների մեջ եղել է նաև ոստիկան։ «Հրապարակի» աղբյուրի փոխանցմամբ՝ ժամը 6-7-ի սահմաններում մի խումբ անձինք մոտեցել են ծառայություն իրականացնող ոստիկանին, կարճ զրույց ունեցել, ապա ոստիկանին նստեցրել են իրենց մեքենան ու անհետացել։ Ինչից հետո պարզվել է, որ նույն խումբը «ռազբորկան» շարունակել է Արթիկի օբյեկտներից մեկում, որտեղ քիչ անց ծեծկռտուք է սկսվել։
Խումբը դաժան ծեծի է ենթարկել ոստիկանին, վերջինս էլ իրեն ամրակցված զենքից կրակել է հակառակորդների ուղղությամբ։ Ըստ «Հրապարակի» աղբյուրի՝ ոտքից վիրավորվել է խմբի «պարագլուխը»՝ ոմն Անուշավան, որը, ըստ արթիկցիների, ԲՀԿ-ական պատգամավոր Մարտունիկ Գրիգորյանի մերձավորներից է։ Տարիներ առաջ նույնիսկ եղել է Մարտունիկի հանգուցյալ հորեղբոր՝ քրեական հեղինակություն համարվող Սերոբի թիկնապահը։
Վիրավորված ոտքով սույն Անուշավանն ընկերների հետ միասին հետապնդել է ոստիկանին, որը փախչելով՝ շարունակել է դրսում օդ կրակել։ Թե ինչից է առաջացել վեճը, «Հրապարակին» չի հաջողվել մանրամասներ ճշտել Արթիկի ոստիկանությունից։ «Հրապարակի» տեղեկությամբ՝ վեճը սկսվել է այն բանից հետո, երբ խումբը փորձել է հաշվեհարդար տեսնել ոստիկանի հետ՝ վերջինիս եղբոր հետ կապված ինչ-որ հարցի վերաբերյալ։
«Հրապարակի» աղբյուրի պատմելով՝ երեկ մինչև ուշ գիշեր դեպքի առնչությամբ ձերբակալություններ են եղել Շիրակի մարզում։ Որոշ խոսակցություններ կան, որ ոստիկանին ծեծի ենթարկելը չեն մարսելու։
Մեկնաբանել