«Արմենիան Քափըր Փրոգրամ» ընկերությունը կրճատել է Ալավերդու մարզադաշտի պահակի հաստիքը. մարզադաշտը թալանվել է
«Արմենիան Քափըր Փրոգրամ» ընկերությունը կրճատել է Ալավերդու «Մետալուրգ» մարզադաշտի 50 հազար դրամ աշխատավարձով պահակի հաստիքը: Արդյունքում մարզադաշտը թալանվել է և դարձել անօգտագործելի:
Լուսինե Մեջլումյան |
«Մենք մեկ տարի առաջ ենք կրճատել «Մետալուրգ» մարզադաշտի պահակի հաստիքը: Ֆինանսական ռեսուրսներ չունենք մարզադաշտի պահպանության ծախսերը հոգալու համար: Հիմա քաղաքային ոչ մի միջոցառում չի կազմակերպվում մարզադաշտում: Ժողովուրդը շատ դաժան է վերաբերվել մարզադաշտի հետ»,- «Հետքին» հայտնեց «Արմենիան Քափըր Փրոգրամ» ընկերության տնօրեն Լուսինե Մեջլումյանը:
«Մետալուրգ» մարզադաշտը, ինչպես նաև ճոպանուղին «Արմենիան Քափըր Փրոգրամ» ընկերության սեփականությունն են: Ընկերության սեփականատերն էլ Վալերի Մեջլումյանն է։ Պատասխանելով մարզադաշտում ստեղծված վիճակի պատճառների մասին մեր հարցին Ալավերդու նախկին քաղաքապետ Կարեն Փարեմուզյանը բացատրեց, որ մինչև քաղաքապետ ընտրվելը Վ. Մեջլումյանի հետ ունեցել են տարաձայնություններ: Այդ պատճառով քաղաքապետի իր աշխատանքը խոչընդոտելու համար դեռ երկու տարի առաջ Վ. Մեջլումյանը փակեց Ալավերդու ճոպանուղին, բարեգործական ճաշարանը և դադարեցրեց քաղաքապետարանի մանկապարտեզների ֆինանսավորումը: Կ. Փարեմուզյանի ասելով` այդ ժամանակ Վ. Մեջլումյանը սկսել էր կրճատել նաև «Մետալուրգ» մարզադաշտի հաստիքները:
«Այդ մարզադաշտը հրաշալի կառույց է, այն չկորցնելու համար իմ բանակցությունների արդյունքում մարզադաշտին տրվեց պահակի հաստիք: Այդ հաստիքով մարզիչ Ռուբեն Ծատինյանը միաժամանակ կատարում էր մարզչի և ցերեկը պահակի պարտականություները: Սակայն կարճ ժամանակ հետո «Արմենիան Քափըր Փրոգրամ» ընկերությունը միտումնավոր կրճատեց նաև պահակի հաստիքը: Մի օր էլ իմացանք նստարանները տարել են, որ մարզադաշտը չօգտագործենք»,-պատմեց Կ. Փարեմուզյանը:
Ալավերդի համայնքի ներկայիս ղեկավար Սասուն Խեչումյանն իր պաշտոնավարման 7 ամիսներին մարզադաշտի վիճակին չի անդրադարձել: Լուսինե Մեջլումյանն ասում է, որ պատրաստ է «Մետալուրգ» մարզադաշտի պահպանության հարցը քննարկել համայնքի ղեկավարի հետ, կարող են անգամ մարզադաշտը հանձնել համայնքապետարանի տնօրինությանը:
«Մետալուրգ» մարզադաշտը 1970թ. կառուցել է Ալավերդու նախկին լեռնամետալուրգիական կոմբինատը, ունի 724 նստատեղ: Մարզադաշտն իր գոյության 47 տարիներին ծառայել է ինչպես գործարանի մետալուրգներին, այնպես էլ Ալավերդու ողջ բնակչությանը: Եղել է համայնքային սպորտային և մշակութային միջոցառումների վայր: Այն վերջին անգամ կապիտալ վերանորոգվել է 2005թ.՝ «Վալլեքս» խմբի ընկերությունների նախագահ Վալերի Մեջլումյանի հիմնադրած «Մանես» հիմնադրամի կատարած 23 մլն դրամ ներդրումով: Կապիտալ վերանորոգումից հետո մարզադաշտին 400 նստարան է նվիրել Երևանի Միքայելյանի անվան վիրաբուժության ինստիտուտի տնօրեն, ալավերդցի Համլետ Թամազյանը:
Մենք մի քանի կոտրած նստարաններ տեսանք մարզադաշտի հանդերձարաններից մեկում: Տնօրեն Լուսինե Մեջլումյանն ասաց, որ մարզադաշտի նստարաններն անհայտ մարդիկ ջարդում էին, այդ պատճառով իր հրահանգով նստարանները հանվել և պահեստավորվել են:
Մարզադաշտի շրջակա տարածքը թաղված է աղբի մեջ: Պատառոտված են դարպասների ցանցերը, իսկ խոտածածկույթը հասնում է մոտ մեկ մետրի: Քանդված և թալանված են հանդերձարանները, դռները, լոգարանները, զուգարանները, ջարդված են պատուհանների ապակիները և սանհանգույցները: Մարզադաշտում հանդիպեցինք ալավերդցի երկու պատանիների: Բասկետբոլի դաշտի զամբյուղի մեջ նրանք գնդակ էին նետում: Նրանցից Էրիկ Պետրոսյանը սովորում է Ալավերդու թիվ 2 դպրոցի 9-րդ դասարանում: «Ալավերդու վիճակը վատ է, բայց մեր մարզադաշտի վիճակը շատ ավելի վատ է»,- ասաց Էրիկը:
Մինչ պահակի հաստիքի կրճատումը մարզադաշտում գործել են 8-16 տարեկան 80 երեխաների ֆուտբոլի 4 խմբեր: Հիշեցնենք, որ մարզադաշտում մարզվող Ալավերդու մանկապատանեկան ֆուտբոլի թիմը 2008-2009թթ. ֆուտբոլի հանրապետական մրցումներում գրավել է 1-ին տեղը:
«Մենք ի՞նչ կապ ունենք «Մետալուրգ» մարզադաշտի հետ: Մարզադաշտի սեփականատերը «Արմենիան Քափըր Փրոգրամ» ընկերությունն է: Տեղյակ ենք, ահավոր վիճակում է մարզադաշտը: Այնքան վատ վիճակում է մարզադաշտը, որ քաղաքային մարզական փառատոնը անցկացրել ենք քաղաքի մարզադպրոցի հարևան տարածքում»,- ասաց փոխհամայնքապետ Արթուր Վարոսյանը: Համայնքի ղեկավար Սասուն Խեչումյանի հետ մեզ չհաջողվեց խոսել «Մետալուրգ» մարզադաշտի ճակատագրի մասին: Համայնքապետարանից մեզ հայտնեցին, որ նա գոծուղման է մեկնել։
Լուսինե Մեջլումյանը խոստացավ, որ անձրևները դադարելուց հետո իրենք կարգի կբերեն մարզադաշտը: Նա ասաաց, որ մարզադաշտի պահապանության գործում ակնկալում է Ալավերդու համայնքապետարանի աջակցությունը:
Համայնքի ավագանու անդամ Հարություն Ձավարյանի խոսքով` մարզադաշտում մարզումները վերսկսելու համար համայնքի ղեկավար Սասուն Խեչումյանը պետք է քննարկումներ սկսի «Արմենիան Քափըր Փրոգրամ» ընկերության տնօրենի հետ: Ավագանու անդամը խոստացավ խնդիրը բարձրացնել ավագանու առաջիկա նիստում:
Մեկնաբանություններ (11)
Մեկնաբանել