Սամվել Ալեքսանյանը պատասխանում է «Հետքի» հարցերին 

Երեւանի «Փակ շուկա»-ն վերջնականապես փակվեց հունվարի մեկին: Մամուլում լուրեր էին պտտվում այն մասին, որ շուկան գնել է գործարար Սամվել Ալեքսանյանը եւ պատրաստվում է այն վերածել վիթխարի սուպերմակետի քաղաքի կենտրոնում: 

Դեռեւս 2011-ի սեպտեմբերին Սամվել Ալեքսանյանը news.am-ին տված հարցազրույցում հերքել էր լուրը, թե Գագիկ Ծառուկյանից գնել է «Փակ շուկան». «Նման բան չկա, ես պաշտոնապես հերքում եմ»: 

Այսօր Սամվել Ալեքսանյանին հանդիպեցինք «Փակ շուկայի» դիմաց` աշխատակիցներին եւ վստահված անձանց ցուցումներ տալիս: Նա պատասխանեց «Հետքի» հարցերին` չձայնագրելու պայմանով: Խոսակցությունը ներկայացնում ենք հարցազրույցի տեսքով, որը վերարտադրել ենք մեր զրույցից անմիջապես հետո: 

Պրն Ալեքսանյան, ճի՞շտ է, որ «Փակ շուկան» պատրաստվում եք դարձնել «Երեւան սիթի»:  

«Փակ շուկան» «Երեւան սիթի» չի դառնալու: Վերանորոգելու ենք, շենքը նորմալ տեսքի բերենք: 

Մշակույթի նախարարության հուշարձանների պահպանության գործակալության տրամադրած տեղեկության համաձայն` ամիսներ առաջ ինչ-որ ճարտարապետներ նախագիծ են ներկայացրել գործակալություն, որտեղ նշված է եղել, որ տարածքը շահագործվելու է որպես սուպերմարկետ: 

Տարածքում միայն շուկա չի լինելու, խանութներ էլ են լինելու: Տեսե՞լ եք շուկայի կողքի բուտիկները. առեւտրականներն իրենց համար այդ տարածքները ծառայեցնում էին որպես պահեստ: Հիմա այդ բուտիկներում լինելու են առեւտրի կետեր, իսկ առեւտրականների համար հատուկ պահեստներ նախատեսված կլինեն: 

Երեւանի «Փակ շուկան» քաղաքի պատմական եւ մշակութային արժեքներից մեկն է: Արդյո՞ք կառույցի վրա կմնա «ՇՈՒԿԱ» գրությունը, թե՞ դրան կփոխարինի «Երեւան սիթի» գրությունը:

«Երեւան սիթի» գրություն չի լինելու կառույցի վրա: 

«Շուկա» գրությունը կմնա՞: 

Այո: Շուկան ունենալու է նաեւ ստորգետնյա ավտոկայանատեղի:

Շուկայի հիմքը փորելը չի՞ վնասի կառույցը: 

Էս շուկան կառուցվել է դեռ սովետի թվին: Էն ժամանակ մարդիկ մեքենաներ չեն ունեցել, իսկ հիմա բոլորը ջիպ ունեն: Ընտանիք կա` համ տղեն ջիպ ունի, համ աղջիկը... Պետք է, չէ՞, ժամանակի ստանդարտներով առաջնորդվել: 

(«Ո՞վ ջիպ ունի» հարցին պատասխանեց Սամվել Ալեքսանյանի վստահված անձանցից մեկը. «Ես էլ ջիպ ունեմ օրինակ»): 

Դուք ունեք ջիպեր, հասարակ մարդիկ, ես, օրինակ, ջիպ չունեմ: 

Դե լավ, ինչեւէ... բայց որ ավտոկայանատեղի անհրաժեշտ է` հաստատ: 

Պրն Ալեքսանյան, խոստանո՞ւմ եք, որ շուկայի վերանորոգումից հետո հասարակ գյուղացին կրկին հնարավորություն կունենա նույն շուկայում առեւտրով զբաղվել: 

Եթե նախկինում այս շուկայում մոտ 25 հոգի էր զբաղվում առեւտրով, շուկան վերանորոգելուց եւ խանութներ բացելուց հետո մոտ 300 մարդ աշխատատեղ կունենա: Հիմա այդ 25 հոգին տեղափոխվել են Մասիվի շուկա, բայց հետո, այո, կգան, կաշխատեն: 

Հ.Գ. Սամվել Ալեքսանյանը նաեւ խոստացավ, որ շուկայում կատարվող մաքրման աշխատանքներից հետո «Հետքին» կտրամադրի վերանորոգման նախագիծն ու թույլ կտա շուկայի ներսում տեսա- եւ լուսանկարահանումներ կատարել: