ՀՀ փոխվարչապետ, տարածքային կառավարման նախարար, Մարդահամարի կազմակերպման եւ անցկացման համապետական հանձնաժողովի նախագահ Ա.Գեւորգյանն այսօր ընդունեց ՀՀ-ում Եվրոպական միության մշտական պատվիրակության ղեկավար, դեսպան Ռաուլ Լուցենբերգերին: Հանդիպմանը ներկա էր նաեւ ՀՀ ազգային վիճակագրական ծառայության պետ Ստեփան Մնացականյանը:

Կողմերը քննարկել են Հայատանում մարդահամարի անցկացման աշխատանքներին Եվրամիության աջակցության հնարավորությանը վերաբերող հարցեր:

Փոխվարչապետը ներկայացրել է մարդահամարի նախապատրաստման եւ անցկացման աշխատանքները, տեղեկատվություն ներկայացրեցլ կատարված աշխատանքների, մասնավորապես` 2010 թ.-ի հոկտեմբերին անցկացված փորձնական մարդահամարի վերաբերյալ: Նշվել է նաեւ մարդահամարի համար անհրաժեշտ ֆինանսական ծավալների, ինչպես նաեւ այն ֆինանսական միջոցների մասին, որոնք ՀՀ կառավարությունն ակնկալում է ներգրավել դոնոր կազմակերպությունների, մասնավորապես` ԵՄ կառույցների եւ ԵՄ անդամ պետությունների միջոցով:

Ա. Գեւորգյանը տեղեկացրել է, որ մարդահամարի կազմակերպման համար պետբյուջեից հատկացումները կկազմեն ընդհանուր գումարի 25 տոկոսը` նախորդ մարդահամարի 21 տոկոսի փոխարեն: Ֆինանսական այլ միջոցների ներգրավման համար ՀՀ կառավարությունն ակտիվ աշխատանքներ է տանում միջազգային եւ դոնոր կազմակերպությունների հետ:

ՀՀ-ում Եվրոպական միության պատվիրակության ղեկավար Ռաուլ Լուցենբերգերը, կարեւորելով մարդահամարի անցկացումը եւ պատրաստակամություն հայտնեց աջակցել գործընթացին, ներկայացրեց Եվրամիության աջակցության հնարավոր տարբերակները:

Ա. Գեւորգյանը շնորհակալություն հայտնելով մոտեցման համար` նշել է, որ ՀՀ կառավարությունն առաջիկայում կքննարկի հայկական կողմի համար համագործակցության առավել արդյունավետ տարբերակը` աշխատանքները ԵՄ-ի հետ շուտափույթ սկսելու նպատակով:

Հանդիպման ընթացքում քննարկվել են նաեւ տարածքային զարգացման բնագավառում ԵՄ-ի հետ համագործակցությանն առնչվող հարցեր: Փոխվարչապետը տեղեկացրել է, որ ԵՄ-ի հետ այս բնագավառում իրականացվող ծրագրերը հայկական կողմից համակարգելու է ՀՀ տարածքային կառավարման նախարարի առաջին տեղակալ Վ.Տերտերյանը: Միեւնույն ժամանակ Ա. Գեւորգյանը կարեւորել է ԵՄ-ի հետ համագործակցությունը` կարծիք հայտնելով, որ տարածքների համաչափ զարգացման բնագավառում ԵՄ-ի հետ համագործակցությունը Հայաստանի համար ունի ռազմավարական նշանակություն: Պայմանավորվածություն է ձեռք բերվել, որ առաջիկայում ՀՀ տարածքային կառավարման նախարարի առաջին տեղակալ Վ.Տերտերյանն աշխատանքային այցով կմեկնի Բրյուսել, որի ընթացքում նախատեսվում է քննարկել համատեղ իրականացվող ծրագրերի շրջանակը եւ համագործակցության ընդլայնման եւ խորացման հեռանկարները:

Հանդիպման ընթացքում անդրադարձ է եղել նաեւ Եվրոպական ռեգիոնների ասամբլեային Հայաստանի Հանրապետության, մասնավորապես` Տավուշի եւ Լոռու մարզերի անդամակցությանը: Կողմերը կարեւորել են տարածքային իշխանությունների ուղիղ համագործակցության հնարավորությունը` նշելով, որ նման գործակցությունը զարգացման մեծ ներուժ ունի: