HY RU EN

Սեդա Ղուկասյան

Էդուարդ Շարմազանով. «Նիկոլ Փաշինյանն էլ ժամանակին ՀԱԿ-ի դեմքն էր, գնաց ՔՊ-ն ստեղծեց»

ՀՀԿ առաջին տեղակալ, նախկին վարչապետ Կարեն Կարապետյանն առաջիկայում կհրաժարվի կուսակցության փոխնախագահի պաշտոնից, սակայն դեռ պարզ չէ՝ լքելու է նաև կուսակցությունը, թե ոչ:

Այս մասին խորհրդարանում լրագրողների հետ զրույցում ասաց ՀՀԿ մամուլի խոսնակ, ԱԺ փոխխոսնակ Էդուարդ Շարմազանովը:

«Պարոն Կարապետյանի որոշումը գնահատում եմ շատ նորմալ, Կարեն Կարապետյանը հասուն քաղաքական գործիչ է, ինքն է որոշում լինել կուսակցության նախագահի առաջին տեղակալ թե չլինել, հարգանքով եմ վերաբերվում իր այդ որոշմանը»,- ասաց Շարմազանովը:

Շարմազանովի խոսքով՝ առաջիկայում կլինի ՀՀԿ խորհրդի նիստ, որի օրակարգում էլ կլինի կուսակցության փոխնախագահների ընտրության հարցը:

Մեր դիտարկմանը, որ խորհրդարանական ընտրությունների քարոզարշավի ժամանակ Կարեն Կարապետյանը դարձել էր ՀՀԿ դեմքը, Շարմազանովն ասաց.

«Նիկոլ Փաշինյանն էլ ժամանակին ՀԱԿ-ի դեմքն էր, գնաց ՔՊ-ն ստեղծեց, մենք ցանկացած քաղաքական գործչի որոշման հարգանքով ենք վերաբերվում»:

Հետաքրքրվեցինք՝ առաջիկայում կուսակցությունը համագումար հրավիրելո՞ւ է, Շարմազանովն ասաց, որ դեռ չեն քննարկել, իսկ կուսակցության փոխնախագահների ընտրության հարցը կլինի խորհրդի առաջիկա նիստում:

Դիտարկմանը, որ հրաժարականից հետո Սերժ Սարգսյանը չէր բացառում, որ կլինի կուսակցության նախագահի փոփոխություն, Շարմազանովն ասաց.

«Ժամանակը կգա, կքննարկենք, էս պահին քննարկում չկա, չեմ բացառում, որ աշնանը քննարկենք կուսակցության ապագայի հետ կապված հարցերը»: