Նպատակային ծրագրերի շրջանակներում «Հայաստան» համահայկական հիմնադրամի Տորոնտոյի տեղական մարմնի անանուն բարերարի հովանավորությամբ հիմնանորոգվել են Երեւանի Սբ. Գրիգոր Լուսավորիչ հիվանդանոցի դիալիզի եւ նեֆրոլոգիայի բաժանմունքները: 

Հիմնանորոգվել է ընդհանուր առմամբ 1120 քմ մակերես ունեցող տարածք, ներառյալ սանհանգույցները, ճաշարանը, ութ հիվանդասենյակ եւ երկու աշխատասենյակ: Նորացվել են էլեկտրական, ջրամատակարարման  եւ ջեռուցման համակարգերը: 

Դեկտեմբերի երկրորդ կեսից սկսած բաժանմունքները լիարժեք շահագործվում են: Բաժանմունքի վարիչ Ռազմիկ Փանդունցի խոսքով` նոր պայմանները զգալիորեն բարձրացրել են ընդհանուր տրամադրությունը բաժանմունքներում եւ դժվար չէ նկատել, որ բարեկարգ վիճակը դրական է անդրադառնում թե’ բուժաշխատողների եւ թե’  հիվանդների վրա: 

Բուժանձնակազմը կազմված է 36 հոգուց,, որից վեցը` բժիշկ, երեսունը` բուժքույր: Ներկայումս այստեղ բուժվում է 50-55 հիվանդ: Բաժանմունքները միասին կարող են սպասարկել մինչեւ 80 հիվանդի: 

Հիմնադրամի Տորոնտոյի տեղական մարմնի հովանավորությամբ ներկայումս Հիմնադրամն իրականացնում է  եւս երկու ծրագիր. Երեւանում վերանորոգվում են Նորքի տուն-ինտերնատի 3-րդ եւ 4-րդ հարկերը, իսկ Շուշիում` քաղաքի ուսումնական եւ մշակութային կենտրոնը: Այս մասին հայտնում է «Հայաստան» համահայկական հիմնադրամը: