Տնտեսական զարգացման և ներդրումների նախարար Արծվիկ Մինասյանն այսօր հանդիպում է ունեցել Հայաստանում Արաբական Միացյալ Էմիրությունների արտակարգ և լիազոր դեսպան Ջասիմ Մուհամմադ Ալ Կասեմիի և արաբ գործարարների հետ, որոնք հետաքրքրված են Հայաստանում ներդրումներ կատարելու և բիզնես գործունեություն ծավալելու։ Հանդիպմանը մասնակցել են նաև նախարարության պատասխանատու անձինք։

Նախարարության տեղեկատվության և հասարակայնության հետ կապերի բաժնի տեղեկացմամբ` նախարարը ներկայացրել է Հայաստանում գործարար միջավայրի բարելավման և ներդրումների պաշտպանության ուղղությամբ իրականացվող բարեփոխումները, անդրադարձել  որպես ԵԱՏՄ անդամ երկիր և դեպի Եվրամիության շուկաներ մուտքի համար մեր երկրին ընձեռված հնարավորություններին, նաև Հայաստանի ազատ տնտեսական գոտիներում գործունեություն ծավալելու առավելություններին։

Դեսպան Ալ Կասեմին շնորհակալություն է հայտնել հանդիպման համար և նշել, որ ԱՄԷ-ի հետ առևտրատնտեսական կապերը զարգանում են, ինչի վկայությունը առևտրաշրջանառության կրկնակի աճն է։

Արաբ գործարարները ներկայացրել են այն ոլորտները, որոնցով հետաքրքրված են, մասնավորապես, խոսվել է գյուղատնտեսությունում, վերականգնվող էներգետիկայի, զբոսաշրջության ոլորտներում փոխգործակցության մասին։

Արծվիկ Մինասյանը ողջունել է գործարարների նախաձեռնողականությունը և հայտնել նախարարության կողմից գործարարության խթանման և աջակցության պատրաստակամության մասին։