ԱԻՆ-ը հայտնում է, որ հանրապետությունում ամառային եղանակին ջերմաստիճանի բարձրացման պատճառով անտառային և հարակից բուսածածկ տարածքներում մեծանում է հրդեհների առաջացման և տարածման վտանգը: Հրդեհավտանգ իրավիճակները, ըստ նախարարության, մեծամասամբ պայմանավորված են մարդկային գործոնով: Մեկ անզգույշ քայլը կարող է անդառնալի հետևանքների հանգեցնել: 

Հրդեհները լուրջ վտանգ են ներկայացնում անտառային հարուստ կենսաբազմազանության, այդ թվում' նաև հազվագյուտ և անհետացման եզրին գտնվող բուսական և կենդանական տեսակների համար: Քանի որ բուսածածկ տարածքների հրդեհները զգալիորեն փոխում են մթնոլորտի կազմը, ապա անխուսափելիորեն ազդում են նաև մարդկանց առողջության վրա` վնասելով շնչառական օրգանները և արյան շրջանառության համակարգը: Ուստի նախարարությունը հորդորում է խուսափել անտառային տարածքներում խարույկ վառելուց, լուցկի կամ չմարված ծխախոտի մնացորդ նետելուց, ապակե կամ պլաստմասսե իրեր թողնելուց եւ այլն:

Միաժամանակ տեղեկացնում է, որ գործող օրենսդրությամբ քրեական և առանձնապես խոշոր չափերի հասնող նյութական պատասխանատվություն է սահմանված ինչպես դիտավորությամբ, այնպես էլ' անզգուշությամբ անտառային տարածքներին վնաս պատճառելու համար: