HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Տաթև Խաչատրյան

Փոփոխություններ՝ կաթնամթերքի մակնշման մեջ

Կաթնային ու կաթ պարունակող ապրանքները շուտով ավելի հեշտ կլինի տարբերակել. Եվրասիական տնտեսական հանձնաժողովը մի շարք փոփոխություններ է իրականացրել այդ ապրանքների մակնշման կանոններում: Այս մասին նշված է ԵՏՀ պաշտոնական կայքում:

Այս փոփոխությունները «Կաթի և կաթնամթերքի անվտանգության մասին» ՝ ՄՄ ՏԿ 033/2013 տեխնիկական կանոնակարգում ընդունվել են դեռևս 2017թ. նոյեմբերի 20-ին՝ Եվրասիական տնտեսական հանձնաժողովի որոշմամբ, և ուժի մեջ են մտնելու այս տարվա հուլիսի 16-ից:

Ըստ այդ նախագծի՝ մակնշման փոփոխությունները թույլ կտան սպառողին հստակորեն տարբերակել կաթնային յուղ կամ դրա փոխարինիչ պարունակող կաթնային արտադրանքները, քանի որ մակնշման մեջ դրա մասին արդեն պետք է նշվի հատուկ տառատեսակով, գույնով և չափով:

Մասնավորապես, արտադրողը պարտավոր է մակնշման մեջ նշել տեղեկություն բուսական յուղի պարունակության, ինչպես նաև՝ կաթի յուղի փոխարինիչի առկայության վերաբերյալ:

Ավելին, «պարունակում է բուսական յուղեր» գրությունը պետք է տեղակայվի պիտակի հատուկ մասում և այնպիսի տառատեսակով ու գույնով, որ լավ տեսանելի լինի:

Փոփոխությունների համաձայն՝ ապրանքի անվանման մեջ անպայման պետք է նշվի, որ այն կաթնամթերք չէ, այլ կաթնային յուղի փոխարինիչով, կաթ պարունակող արտադրատեսակ: Բացի այդ, անվանումը պետք է ներառի այն ապրանքի տեխնոլոգիան, որով պատրաստվել է:

Օրինակ` թթվասերանման կաթնային արտադրանքի դեպքում պետք է գրվի՝ կաթ պարունակող արտադրանք՝ կաթնային յուղի փոխարինիչով՝ արտադրված թթվասերի տեխնոլոգիայով, կամ կաթ պարունակող արտադրանք՝ կաթի յուղի փոխարինիչով՝ պատրաստված կաթնաշոռի տեխնոլոգիայով և այլն:

Մակնշման մեջ թույլատրվում է «կաթ պարունակող արտադրանք»-ը փոխարինել այն ապրանքատեսակի անվանումով, որի «նմանակը» պատրաստվել է: Օրինակ` կաթ պարունակող կաթնաշոռ, թթվասեր, կրեմ  և այլն:

Սակայն, կաթի յուղի փոխարինիչով կաթ պարունակող արտադրանքի մակնշման մեջ չի թույլատրվում այնպիսի հասկացությունների կիրառումը, որոնք տեխնիկական կանոնակարգով նախատեսված են կաթի և կաթնային արտադրանքի համար, ինչպես նաև՝ բոլոր այն դեպքերում, երբ ապրանքի անվանումից սպառողը կարող է մոլորության մեջ ընկնել:

Մասնավորապես, կաթ պարունակող ապրանքների մակնշման մեջ բացառվում է կաթնային արտադրանքի հետ առնչվող բառերի կիրառումը, ինչպիսիք են՝ «պանրանման», «պանրային», «պանրագործական», «թթվասերիկ», «կաթնաշոռիկ», «կարագիկ» և այլն:

Այս փոփոխության նպատակն է՝ սահմանել խստացված պահանջներ կաթ և կաթնային յուղի փոխարինիչ պարունակող ապրանքների մակնշման նկատմամբ, որպեսզի հավասար պայմաններ ստեղծվեն արտադրողների համար, և մարդկիկ էլ չընկնեն թյուրիմացության մեջ:

ԵՏՀ՝ 2018թ. մարտի 20-ի որոշման համաձայն՝ սահմանվել են անցումային դրույթներ, որոնցով տեխնիկական կանոնակարգում կատարված փոփոխությունները կմտնեն ուժի մեջ:

Ըստ դրանց՝ սահմանված է, որ մինչև 2019թ. հունվարի 16-ը ԵԱՏՄ երկրներում կաթ արտադրողները կարող են արտադրել կաթ պարունակող ապրանքներ՝ հին մակնշմամբ և վաճառել դրանք, եթե ունեն տեխնիկական կանոնակարգի համապատասխանության գնահատման անհրաժեշտ փաստաթղթերը, որոնք տրվել են մինչև փոփոխությունների ուժի մեջ մտնելը:

Հին մակնշում ունեցող ապրանքի շրջանառությունը կթույլատրվի պիտանելիության ժամկետի ողջ ընթացքում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter