HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Քրեական հեղինակություն «Նորատուսցի Ալիկի» պաշտպանն ու մի լրագրող մինչև իշխանափոխությունը դիմում են ուղարկել Սերժ Սարգսյանին

Քրեական աշխարհում «Նուրատուսցի Ալիկ» անունով հայտնի Ալիկ Բանդուրյանի պաշտպան Երեմ Սարգսյանը և Slaq.am կայքի լրագրող Աննա Սահակյանը մինչև իշխանափոխությունը դիմել են Սերժ Սարգսյանին՝ ակնկալով նրա միջամտությունը Բանդուրյանի՝ Սահմանդրությամբ երաշխավորված անձնական ազատության և անձեռնմխելիության իրավունքների շարունակական խախտումները վերացնելու հարցում: Այս մասին պարզ դարձավ այսօր «Լիա» գեղեցկության սրահի նկուղային հարկում տեղի ունեցած սպանության գործով դատական նիստին:

Դատարանը հուլիսի 6-ին Դատական դեպարտամենտից ստացել էր Սերժ Սարգսյանին ուղղված վերը նշված գրությունները՝ թվագրված 2018 թվականի մարտի 14-ի ամսաթվով:

Գրություններից մեկ ամիս չանցած, փաստորեն, Հայաստանում իշխանափոխություն է եղել: Մեզ հետ զրուցում Ալիկ Բանդուրյանի պաշտպան Երեմ Սարգսյանը պարզաբանեց, որ դիմումը Սերժ Սարգյանին է ուղղվել, քանի որ վերջինս է Սահմանդրության երաշխավոր հանդիսացել: Ըստ պաշտպանի՝ Ալիկ Բանդուրյանը լուրջ առողջական խնդիրներ ունենալով՝ արդեն երկար ժամանակ կալանքի տակ է:

Թե ինչ մեխանիզմով պիտի այն ժամանակ վարչապետի պաշտոնը զբաղեցնող Սերժ Սարգսյանը միջամտեր կոնկրետ քրեական գործի ընթացքում դատավորի կողմից Բանդուրյանին կալանքի տակ պահելու որոշման վրա, պարզ չէ:

Դատավոր Նելլի Բաղդասարյանը, ի պատասխան դիմումների, մեջբերեց Քրեական դատավարության օրենսգրքի 40-րդ հոդվածը, որը սահմանում է.

1. Արդարադատություն իրականացնելիս դատավորներն անկախ են և ենթարկվում են միայն օրենքին:

2. Դատավորները քրեական գործերը և նյութերը լուծում են իրենց ներքին համոզմամբ` ներկայացված ապացույցների պատշաճ հետազոտման հիման վրա: Դատավորները կաշկանդված չեն գործի մինչդատական վարույթում արված եզրահանգումներով:

3. Արդարադատությունն իրականացվում է դատավորների նկատմամբ կողմնակի ներգործությունը բացառող պայմաններում:

4. Դատավորների նկատմամբ ապօրինի ներգործություն դրսևորելու, ինչպես նաև դատարանի կողմից քրեական դատավարության իրականացմանը այլ միջամտության համար մեղավոր անձինք կրում են օրենքով նախատեսված պատասխանատվություն:

Այս գործով նախորդ դատական նիստի ավարտին Սարգսյանը ժամանակ էր խնդրել դատավոր Բաղդասարյանին ինքնաբացարկի միջնորդություն ներկայացնելու համար, սակայն այսօր նշեց, որ միջնորդությամբ հանդես չի գալու

Այս գործն արդեն գտնվում է ավարտական փուլում: Դատաքննությունը լրացնելու միջնորդություններ չեղան, և դատավորը հայտարարեց դատական վիճաբանությունների փուլին անցնելու մասին: Հաջորդ դատական նիստին մեղադրական ճառով հանդես կգա դատախազ Գևորգ Գևորգյանը:

Հիշեցնենք, որ 2016-ի նոյեմբերի 13-ին Շենգավիթ վարչական շրջանում գործող «Լիա» գեղեցկության սրահի նկուղային հարկում կրակոցներ են հնչել, որի հետևանքով 25-ամյա Գևորգ Ավետիսյանը տեղում մահացել է, իսկ հրազենային վիրավորում ստացած 35-ամյա Արամ Պետրոսյանն ու 38-ամյա Մուշեղ Մուշեղյանը տեղափոխվել են «Սուրբ Աստվածամայր» բժշկական կենտրոն. վերջինս հիվանդանոցում մահացել է: Ըստ մեղադրանքի՝ Ալիկ Բանդուրյանը Պետրոս Իսրայելյանին դրդել է այլ անձանց հետ համատեղ, Մուշեղ Մուշեղյանի առողջությանը դիտավորությամբ ծանր վնաս պատճառել, ինչպես նաև նույն օրը հանցավոր խմբին օժանդակել է պլանավորված հանցագործության անխոչընդոտ իրականացմանը՝ Մուշեղ Մուշեղյանի առողջությանը ծանր վնաս պատճառելու գործընթացը հեշտացնելու, հետևաբար դրա խոչընդոտները վերացնելու եղանակով:

Արմեն Լյովայի Գասպարյանին մեղադրանք է առաջադրվել այն բանի համար, որ նա, հանդիսանալով Ալիկ Բանդուրյանի մտերիմը և մշտապես ուղեկցելով նրան, հաստատապես տեղեկացել է Ալիկ Բանդուրյանի օժանդակությամբ և դրդչությամբ 2016թ. նոյեմբերի 13-ին Պետրոս Իսրայելյանի, Գևորգ Ավետիսյանի և քննությամբ չպարզված անձանց կողմից նախապատրաստվող ծանր հանցագործության, այն է` Պետրոս Իսրայելյանի, Գևորգ Ավետիսյանի և քննությամբ չպարզված այլ անձանց կողմից խմբի կազմում դիտավորությամբ Մուշեղ Մուշեղյանի առողջությանը ծանր վնաս պատճառելու մասին, սակայն Արմեն Գասպարյանը դրսևորել է հանցավոր անգործություն և նախապատրաստվող ծանր հանցագործության մասին դիտավորությամբ չի հայտնել իրավասու մարմիններին:

Ըստ մեղադրանքի` Պետրոս Իսրայելյանը, նախնական համաձայնության գալով Գևորգ Ավետիսյանի և քննությամբ չպարզված անձանց հետ, խմբի կազմում, Ալիկ Բանդուրյանի օժանդակությամբ իրագործել է Մուշեղ Մուշեղյանի նկատմամբ պլանավորված հանցավոր ոտնձգությունը, սակայն հանդիպելով Մուշեղ Մուշեղյանի զինված դիմադրությանը՝ վերջինիս կողմից անհրաժեշտ պաշտպանության վիճակում ատրճանակով կրակոցներ արձակելուն, Մուշեղ Մուշեղյանի դիմադրությունը հաղթահարելու և այդ ժամանակ ծագած` Մուշեղ Մուշեղյանին սպանելու հանցավոր դիտավորությունն ավարտին հասցնելու նպատակով ապօրինաբար վերջինիս ուղղակի դիտավորությամբ զրկել է կյանքից:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter