«Մեկ կաթսայի երկու գլուխները» վերնագրով խմբագրականում այսօր «Հայկական ժամանակը» գրել է. «ՀՀ ոստիկանապետ Ալիկ Սարգսյանի եւ ոստիկանության Երեւանի վարչության պետ Ներսես Նազարյանի հակամարտությունը ուշագրավ դրսեւորումներ է ստանում' կողմերը քարոզչական պատերազմ են սկսել, ինչն առայժմ արտահայտվում է մեկը մյուսի դեմ տվյալների արտահոսքեր կազմակերպելով: Ավելին, այդ արտահոսքերը կազմակերպվում են ոստիկանական մեթոդներով` իրական դեպքի վրա կառուցված կեղծ տեղեկատվություններ մատուցելու ձեւով: Սակայն այս պատմության մեջ առավել ուշագրավ է, որ կողմերը եւ հատկապես Ներսես Նազարյանի թեւը փորձում է հնարավորինս մնալ աննկատ, որպես չմեղադրվի Սերժ Սարգսյանի ասածները անտեսելու մեջ: Դեռեւս մարտին, երբ Սերժ Սարգսյանն այցելել էր ոստիկանություն եւ մասնակցել կոլեգիայի նիստին, մեր տեղեկություններով, վերջում' ոստիկանության բարձրագույն ղեկավարության հեռ առանձնազրույցի ժամանակ Ներսես Նազարյանին նկատողություն է արել' ասելով, որ չփորձի ոստիկանապետի հետ ավելորդ ինտրիգների մեջ մտնել: Ոստիկանության ղեկավար կազմը այս դրվագը ընկալել է որպես Նազարյանին հասցեագրված նկատողություն, բայց մյուս կողմից, եթե Նազարյանին հաջողվի Սերժ Սարգսյանին համոզել, որ Ալիկ Սարգսյանն է իր դեմ ինտրիգներ սարքում, ապա նշված զգուշացումը կարող է նաեւ նրա դեմ օգտագործվել: Ոստիկանությունում այլեւս կասկած չկա, որ Ալիկ Սարգսյանը եւ Ներսես Նազարյանը միաին երկար չեն աշխատելու' նրանցից մեկնումեկն ի վերջո ստիպված է լինելու լքել ոստիկանական համակարգը: Ոստիկանությունում, սակայն, համոզված են, որ այս հակասությունը հանգուցալուծվելու է աշնանը: Իսկ մինչ այդ կողմերից յուրաքանչյուրը Սերժ Սարգսյանին դեպք է ապացուցի իր հավատարմությունը եւ շեֆի աչքերում նսեմացնի դիմացինին»: