HY RU EN

Սեդա Ղուկասյան

Վարչապետը հանձնարարեց քաղաքացիների նամակներին պատասխանել օրենքով սահմանված ժամկետներում

Վարչապետ Նիկոլ Փաշինյանը կառավարության նիստի ընթացքում նախարարներին, պետական մարմինների ղեկավարներին, մարզպետերին, ինչպես նաև անկախ պետական մարմինների ղեկավարներին հանձնարարեց յուրաքանչյուր ամիս առնվազն մեկ անգամ կատարել քաղաքացիների ընդունելություն:

«Մայիսի 8-ից հետո կառավարությանն ուղղված նամակների թիվն աննախադեպ մեծ ծավալների է հասնում: Մենք խնդիր ունենք դրանց մշակման գործընթացը դարձնել առավել արդյունավետ»,- ասաց Նիկոլ Փաշինյանը: Վարչապետն իր աշխատակազմին հանձնարարեց մանրակրկիտ ուսումնասիրել դիմումներն ու ժամանակին արձագանքել քաղաքացիներին:

«Այս խնդրի հետ կապված մենք մի պրոբլեմ ունենք, որտեղ իներցիան դեռևս չենք կարողանալու շատ արագ կանգնեցնել, բայց դրա մասին պետք է մտածենք։ Ցավոք, քաղաքացիներին շատ դեպքերում տրվում է ստանդարտ, կներեք այդ բառի համար՝ ցրողական պատասխան: Հասկանում եմ, որ կան համակարգային խնդիրներ, պետք է մտածենք, թե այս ոլորտում ինչպես բարձրացնենք արդյունավետությունը: Պետք է խստագույնս պահպանել դիմումներին պատասխանելու ժամկետները»,- ասաց նա։

Վարչապետը հանձնարարեց նաև խստագույնս պահպանել դիմումներին պատասխանելու օրենքով սահմանված ժամկետները։

Կրթության և գիտության նախարար Արայիկ Հարությունյանն արձագանքեց, որ քաղաքացիները նույն նամակը և´ կառավարություն են ուղղում, և´ նախարարություն, ինչը ևս խնդիրներ է առաջացնում։

Վարչապետը համաձայնեց, որ կրկնվող նամակների խնդիր ևս կա։

Արայիկ Հարությունյանն ասաց, որ եթե նախկինում նախարարությունն օրական ստանում էր 50-70 նամակ, ապա այժմ՝ 300-500։

«Կարդացեք և սահմանված ժամկետներում պատասխանեք»,- ժպտալով ասաց վարչապետը։