HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Դիանա Ղազարյան

Գործադիրը մի ընկերության «Մեղրի» ազատ տնտեսական գոտու շահագործողի թույլտվություն տվեց, մյուսին՝ մերժեց

Կառավարությունն այսօրվա նիստին «Բոնվառոն» ընկերությանը «Մեղրի» ազատ տնտեսական գոտու շահագործողի թույլտվություն տրամադրեց, «Փույաքս ջեներալ թրեյդինգ Քօ․»-ին՝ մերժեց։
Մասնավորապես՝ «Բոնվառոն» ՍՊԸ-ին տրամադրվեց շահագործման լիցենզիա՝ մշակող արդյունաբերության (սննդամթերքի արտադրության), առևտրի, լոգիստիկ (սառնարանային և պահեստային տնտեսության) ոլորտներում գործունեություն ծավալելու նպատակով:

Ինչպես ներկայացված է կառավարություն բերված որոշման նախագծում, ծրագրի ընթացքում ապրանքների արտահանման տարեկան ծավալը նախատեսված է 1 մլն դոլարից հասցնել 5,1 մլն դոլարի:

Ընկերությունը արտադրված ապրանքները նախատեսում է արտահանել Վրաստան, Ռուսաստան, հետագայում նաև ԵԱՏՄ այլ անդամ երկրներ, կատարել շուրջ 195 մլն դոլարի նեդրում, ստեղծել 102 նոր աշխատատեղ:

Ընկերությունն ունենալու է մոտ 500 քմ արտադրական տարածք «Մեղրի» ազատ տնտեսական գոտում

«Խնդրում եմ՝ հավանության տալ։ Մեր առաջին ծիծեռնակն է՝ որպես շահագործող այս ոլորտում»,- ասաց հարցը զեկուցող տնտեսական զարգացման և ներդրումների նախարար Արծվիկ Մինասյանը։

Վարչապետ Նիկոլ Փաշինյանը նախարարին հորդորեց մոնիտորինգ իրականացնել՝ հասկանալու համար, թե ընկերությունը գործունեության ընթացքում ինչ դժվարությունների է հանդիպում, քանի որ այս նախագծի ճակատագիրը շատ կարևոր ուղերձ է հղելու այլ գործարարների․ «Մենք պետք է օրինական բոլոր հնարավոր միջոցները ձեռնարկենք, որպեսզի այս նախագիծը լինի հաջողված, լավ ուղերձ լինի պոտենցիալ մյուս ներդրողներին»։

«Բոնվառոն»-ն ստեղծվել է այս տարվա հունիսի 25-ին դրա միակ սեփականատերը Արման Ապիտոնյանն է։

Կառավարությունը մեկ այլ որոշմամբ մերժեց տնտեսական գոտում շահագործման թույլտվություն տրամադրել «Փույաքս ջեներալ թրեյդինգ Քօ․»-ին։ Ընկերությունը նախատեսում էր ազատ տնտեսական գոտում զբաղվել մեքենաների լվացման համակարգերի վաճառքով, սակայն տնտեսական զարգացման և ներդրումների նախարարություն ներկայացված ծրագրում բացակայել է պատշաճ տեղեկատվություն գործարար ծրագրի գնահատման հիմնական չափանիշների` արտահանման ուղղությունների, մարքեթինգային ռազմավարության, տեխնոլոգիական նորարությունների կիրառման, աշխատատեղերի, իրականացվող ներդրումների, սոցիալական միջոցառումների վերաբերյալ, այդ իսկ պատճառով ընկերությանը չտրամադրվեց շահագործման թույլտվություն:

«Փույաքս ջեներալ թրեյդինգ Քօ․»-ն հիմնադրվել է 2014 թվականի նոյեմբերին, այս պահին դրա միակ սեփականատերը Գերմանիայի քաղաքացի Աֆշին Քելիշադին է։

Նշենք, որ «Մեղրի» ազատ տնտեսական գոտին ստեղծվել է 2017 թվականի դեկտեմբերի 15-ին։ Դրա գործառնական տեսակը սահմանված է որպես արտադրարդյունաբերական և լոգիստիկ՝ գյուղատնտեսության, մշակող արդյունաբերության, էլեկտրականության մատակարարման, առևտրի, փոխադրումների և պահեստային տնտեսության, մասնագիտական և տեխնիկական գործունեության, մշակույթի, զբոսաշրջության, զվարճությունների և հանգստի ոլորտներում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter