HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արա Բաբլոյանը մտահոգ է Հայաստանի ներքաղաքական իրավիճակով

ԱԺ նախագահ Արա Բաբլոյանը հայտարարություն է տարածել Հայաստանի ներքաղաքական իրավիճակի վերաբերյալ, որի տեքստը ներկայացնում ենք ստորեւ.

Հարգելի հայրենակիցներ,

Ուշադրությամբ հետեւել եմ ՀՀ կառավարության 100 օրերի գործունեությանը եւ որպես խորհրդարանի ղեկավար՝ գործընկերոջիցս՝ ՀՀ վարչապետ Նիկոլ Փաշինյանից, ակնկալել եմ տեսնել ծրագիր` ուղղված երկրի անվտանգության ապահովմանը, տնտեսական զարգացմանը, բնակչության բարեկեցության բարելավմանը եւ իհարկե ժողովրդավարության էլ ավելի ամրապնդմանը: 100 օրը գուցե քիչ է այս հարցերի վերաբերյալ վարչապետի ամբողջական տեսլականը եւ դրանց լուծման կառուցողական ուղիները լսելու համար։

Անշուշտ գտնում եմ, որ կոռուպցիայի դեմ պետք է պայքարել։ 
Անշուշտ անհրաժեշտ է պայքարել մենաշնորհների դեմ։

Համոզված եմ, որ ժողովրդի ձայնը միշտ պետք է լսել, ժողովրդին հարկավոր է հնարավորինս իրազեկել եւ ներգրավել կարեւորագույն որոշումներն ընդունելիս, քանի որ, ինչպես գիտենք, Հայաստանի Հանրապետության իշխանությունը պատկանում է ժողովրդին։ Սակայն այս ամենն իրականացնելիս պարտավոր ենք առաջնորդվել բացառապես Սահմանադրությամբ եւ օրենքներով, ինչպես նաեւ  Հայաստանի Հանրապետության կողմից ստանձնած միջազգային պարտավորությունների լիարժեք պահպանմամբ:

Այս առումով ցավով եմ արձանագրում, որ խորապես մտահոգված եմ երկրում ստեղծված իրավիճակով։

Երկրի հասարակական-քաղաքական բնականոն կյանքը, պետական իշխանության մարմինների սահմանադրաիրավական հարաբերությունները եւ հանրային համերաշխությունը վտանգված են։ Հասարակությունն իրարամերժ խմբերի՝ հեղափոխության եւ հակահեղափոխության կողմնակիցների բաժանելու եւ անհանդուրժողականությունը խորացնելու վտանգավոր միտումներ եմ տեսնում։ 
Այս մտահոգությունս առավել խորանում է հատկապես վարչապետ Փաշինյանի ելույթում հնչած այս ձեւակերպմամբ, մեջբերում եմ. «Ուրեմն ես խորհուրդ եմ տալիս բոլորին խոսելուց առաջ մտածել, հետո էլ ասում են մեր խոսքի ազատությունը սահմանափակում եք: Դուք դեռ պետք է խոսելուց առաջ մտածել սովորեք, որ հետո ձեր խոսքի ազատության իրավունքի մասին մտածեք»։

Պետք է խոստովանեմ, որ այսպիսի ձեւակերպումներն ինձ համար անսպասելի էր լսել վարչապետ Փաշինյանից այն պարզ պատճառով, որ դա ուղղակի ոտնձգություն է այլակարծության նկատմամբ։

Սրան զուգահեռ դատավորների հասցեին «մատ թափ տալն» ու այլախոհներին Ազգային ավտանգության ծառայությամբ սպառնալը, ոչ միայն ճնշում է դատական իշխանության, այլեւ առհասարակ երկրում հակառակ կարծիք ունեցող ցանկացած մարդու նկատմամբ։

Վարչապետ Փաշինյանի հանրահավաքում հնչեցրած խոսքում միաժամանակ առկա էին ՀՀ սահմանադրական կարգի, պետականության հիմքերի համար խիստ վտանգավոր ուղերձներ, որոնք ուղղակի հակասում են իրավական եւ ժողովրդավարական պետություն կառուցելուն ուղղված ՀՀ կողմից ստանձնած միջազգային պարտավորություններին: 
Մասնավորապես, գործադիր իշխանության ղեկավարի կողմից «Խելքներդ գլուխներդ հավաքեք» դիմելաձեւը դատավորներին պարզապես սպառնալիք է դատական իշխանության անկախությանը, միջամտություն է բոլոր ընթացիկ եւ հետագայում հարուցվելիք դատական քննություններին, որոշումներին: «Անցումային արդարադատության» թեզի ներքո ներկայացվեց օրենքներին հետադարձ ուժ տալու հակաիրավական ակնարկ:

Միաժամանական, գործադիր իշխանության ղեկավարի կողմից` Ազգային ժողովում սահմանադրական փոփոխությունների հնարավոր իրականացումը, այն էլ ցանկալի արդյունքը որեւէ եղանակով ապահովելու սպառնալիքով, ակնհայտ ճնշում եւ պարտադրանք է օրենսդիր իշխանության նկատմամբ: 
Ինձ համար սա առավել անհասկանալի է, քանի որ սպառված չէին այդպիսի քննարկումների եւ որոշման կայացման հնարավորությունները հենց խորհրդարանում: 
 
Այսպիսով, հաշվի առնելով վերոնշյալը՝ նախատեսում եմ հանդիպումներ Հանրապետության նախագահի, Հանրապետության վարչապետի, Մարդու իրավունքների պաշտպանի, Բարձրագույն դատական խորհրդի եւ միջազգային դիվանագիտական առաքելությունների ներկայացուցիչների հետ՝ քննարկելու ստեղծված իրավիճակը: 

Հավատարիմ մնալով  իր սահմանադրական առաքելությանը` հավաստում եմ, որ Ազգային ժողովը շարունակելու է իրականացնել օրենսդրությամբ իրեն վերապահված լիազորությունները:

Մեկնաբանություններ (4)

Առաջ Հայոց Աստված
Արժանապատիվ և հպարտ քաղաքացիներ, այս լույսի արագությամբ պատմության աղբամանում հայտնված բազում հանցագործություններ կատարած խմբակի կառկառուն ներկայացուցիչները մասնավոր են ժամանակ առ ժամանակ իրենց մասին հիշեցնում՝ իրենց իսպառ արժեզրկումը վերսրին արժեվորելու կամ գոնե այդպիսի տպավորություն թողնելու ակնկալիքով: Սա պարզունակ ծուղակ է: Իհարկե, արթուն ու զգոն մնալով հանդերձ, սրանց հետ կապված բոլոր թեմանները պետք է փակենք և միասնաբար լծվենք սուրբ ու մնայուն հայրենաշինության գործին: Առաջ Հայոց Աստված:
Նիկոլի թվից սկսյալ
Կեցցե՜ նոր Հայաստանը և համայն Հայությունը: Քսանմեկերորդ դարը, Նիկոլի թվից սկսյալ, Հայության վերածննդի դարն է: Աներևակաելի, անհավատալի հեքիաթն իրականություն է դարձել: Աատված Հայությանն այցի է եկել: Մարդ կույր ու խուլ պիտի լինի, որ դա չտեսնի ու չլսի:
Վաչե
Արա Բաբլոյանը մտահոգված է իր վիճակով և իր ապագայով․ Եթե նա իմանար ինչ՞ է գալու իր գլխին երբեք չեր թողնի բժշկի մասնագիտությունը և մասնակից դառնար քրեական օբշչակի գործարքներին։ Ոչինչ, եթե մարդն եդ տարիքում չի ջոկում թե ում հետ գործ ուն, որեմն նրան հասնում է։ Այսօր էլ փոխանակ ինքնակամ հրաժարվի իր այդ ամոթալի կարգավիճակից , ներողություն խնդրի ժողովրդից, որ մասնակցել է մարդասպանների ու թալանչիների գործողություններին, որպես բացահայտ կամազուրկ, կատարում է իր շեֆերի հրամանը ՝ հանդես է գալիս հակապետական, հակաազգային հայտարարությամբ։ Այնպիսի տպավորություն է, որ նա զենքով սպառնալիքի տակ է ընթերցում , իրեն անծանոթ և օտար ոճով գրված այդ տեքստը։
Լուսիկ
ՀՀկ այդպես էլ մնաց իրողությունից, ժողովրդից կտրված: Իսկ հասկանալ պետք է մի պարզ բան՝ ձեր ժամանակներն անցել են: Դուք ուժով 20 տարի դանդաղեցրիք, եթե ոչ կանգնեցրիք, ժամանակը, էլ չի հաջողվելու: Your time is over.

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter