ՀՀ տարածքային կառավարման նախարարության ջրային տնտեսության պետական կոմիտեում տեղի ունեցած խորհրդակցությանը ՀՀ փոխվարչապետ, տարածքային կառավարման նախարար Արմեն Գևորգյանին ներկայացվեցին 2011թ. կատարված աշխատանքները և 2012թ. ծրագրերը:

Կոմիտեի նախագահ Անդրանիկ Անդրեասյանը տեղեկացրեց, որ անցած տարի շարունակվել են ջրամատակարարման տևողության ավելացման ու ջրի որակի բարելավ­ման, մատակարարված ջրի դիմաց վճարների հավաքագրման մակարդակի բարձրացման, համակարգում կո­րուստ­ների նվազեցման, ընկերությունների գործունեության արդյունավետության բարձրացման, ոռոգման ենթակառուցվածքների բարելավման և մի շարք այլ ուղղություններով աշխատանքները:

Նշվեց, որ հաստատված ծրագրերի իրականացումը տվել է դրական արդյունքներ. միայն հավաքագրումների գծով 2011 թ. համակարգի գանձումը կազմել է շուրջ 19,53 մլրդ դրամ՝ 2010 թ. 18,73 մլրդ դրամի փոխարեն: Խմելու ջրի մասով գանձվել է շուրջ 15,77 մլրդ դրամ (հասույթի 97,36 %-ը)՝ 2010թ. 15,17 մլրդ դրամի դիմաց: Ոռոգման ոլորտում գանձումը կազմել է 3,76 մլրդ դրամ (հասույթի 82.7%-ը)՝ 2010թ. 3,56 մլրդ դրամի դիմաց:

Պետական բյուջե են փոխանցվել նաև շուրջ 5.58 մլրդ դրամի չափով հարկեր, տուրքեր և պարտադիր վճարներ՝ նախորդ տարվա համեմատ 80 մլն դրամով ավելի՝ չնայած 2011թ. ՋՕԸ-երի կողմից մատուցվող ոռոգման ծառայություններն ազատվել էին ԱԱՀ-ից, իսկ 2010թ. պետբյուջե փոխանցված գումարների մեջ հաշվի էր առնված նաև 500 մլն դրամի չափով ԱԱՀ վճարը:

Անցած տարվա ընթացքում համակարգում տարբեր ծրագրերով կատարված կապիտալ ծախսերի ընդհանուր ծավալը կազմել է 18,2 մլրդ դրամ: Կառուցվել է 652 կմ խողովակաշար և ջրատար (առանց «Հազարամյակի մարտահրավեր-Հայաստան» հիմնադրամի ծրագրի), այդ թվում՝ խմելու ջրագծեր՝ 594,6 կմ, կոյուղու կոլեկտորներ՝ 11,4 կմ, ոռոգման ջրանցքներ և ջրատարներ՝ 46 կմ (որից ՀԲ ծրագրով Արմավիրի և Թալինի մայր ջրանցքներում՝ 20,3 կմ):

«ՀՄՀ-Հայաստան»-ի ծրագրերով 2011թ. իրականացվել են Արզնի-Շամիրամի, Արտաշատի, Շիրակի և Ստորին Հրազդանի մայր ջրանցքների վերականգնման, Շենիկի ինքնահոս համակարգի 1,2 կմ ջրանցքի կառուցման, Արարատյան դաշտավայրի դրենաժային համակարգի մաքրման և խորացման, երրորդ կարգի ջրանցքների, ինչպես նաև 17 պոմպակայանների վերականգնման աշխատանքները:

Ավարտվել են Մարմարիկի ջրամբարի շինարարական աշխատանքները, ինչը թույլ է տալիս ջրամբարում կուտակել 23 մլն խմ լրացուցիչ ինքնահոս ջրաքանակ, որով հնարավոր է լրացուցիչ ոռոգել 1055 հեկտար:

Նշվեց, որ ջրառ իրականացնող ընկերությունների, ինչպես նաև ջուր մատակարարող ջրօգտագործողների ընկերությունների (ՋՕԸ) գործունեությունների արդյունքներով ապահովվել է կայուն ջրամատակարարում: 2011թ. ՋՕԸ-երի սպասարկման տարածքում նախորդ տարվա համեմատ 424 հեկտարով ավելացել են ոռոգվող հողատարածքները:

Ապահովվել է «Հայջրմուղկոյուղի», «Լոռի-ջրմուղկոյուղի», «Շիրակ-ջրմուղկոյուղի» և «Նոր Ակունք» ՓԲԸ-ների տնտեսական գործունեությունը: Ֆրանսիական «Սաուր» կազմակերպության հետ կնքվել է «Հայջրմուղկոյուղի» ՓԲԸ-ի գործադիր մարմնի լիազորությունները մասնավոր կառավարչին հանձնելու կառավարման պայմանագրի գործողության ժամկետը մինչև 2014 թ.-ը երկարաձգելու պայմանագիր:

Շարունակվել է բարելավվել հաշվառման համակարգը, խմելու ջուր մատակարարող կազմակերպությունների սպասարկման տարածքում բաժանորդների մոտ տեղադրված է 624 800 ջրաչափական սարք (ապահովվածությունը՝ 86,9 տոկոս)՝ 2010 թ. համեմատ 17,7 հազարով ավելի:

2011թ. ավարտվել է «Հրազդան քաղաքի ջրամատակարարման և ջրահեռացման համակարգերի բարելավման ծրագիրը», որով իրականացվել է խմելու ջրի քաղաքային ցանցի վերականգնում:

Ավելացվել է խմելու ջրի մատակարարման տևողությունը: Մասնավորապես, «Երևան ջուրը» նախորդ տարվա 21,9 ժամի դիմաց ջրամատակարարման տևողությունը հասցրել է 22,9 ժամի, «Հայջրմուղկոյուղին»՝ 13,7 ժամի դիմաց՝ 15 ժամի, «Շիրակ-ջրմուղկոյուղին»՝ 10,4-ի դիմաց 11,9 ժամի, «Լոռի-ջրմուղկոյուղին» 10,7 ժամի դիմաց՝ 11 ժամի, իսկ «Նոր Ակունք»-ը պահպանել է նախորդ տարվա ցուցանիշը՝ 22,4 ժամ:

Նշվեց, որ համակարգում իրականացված ներդրումային և կազմակերպչական միջոցառումների արդյունքում անցած տարիների համեմատ ավելի քիչ էլեկտրաէներգիա է ծախվսել. 2011թ., նախորդ տարվա համեմատ, շուրջ 17 տոկոսով պակասել է էլեկտրաէներգիայի ծախսը:

Անդրադառնալով 2012թ. անելիքներին՝ Ա.Անդրեասյանը նշեց, որ կշարունակվեն հանրապետության մի շարք քաղաքների և գյուղական բնակավայրերի ջրամատակարարման բարելավման, ջրի կորուստների կրճատման, ջրամատակարարման տևողության աստիճանական ավելացման (նախորդ տարվա նկատմամբ առնվազն 1 ժամով, իսկ կառավարման պայմանագրերով նախատեսված լինելու դեպքում՝ պայմանագրերով նախատեսված չափերով), խմելու և ոռոգման ոլորտներում շուրջ 500 կմ ջրագծերի և ջրանցքների վերանորոգման ու կառուցման և մի շարք այլ աշխատանքները:

2012թ. կշարունակվեն Համաշխարհային բանկի աջակցությամբ և ՀՀ կառավարության համաֆինանսավորմամբ «Ոռոգման համակարգերի վերականգնման հրատապ լրացուցիչ ֆինանսավորման ծրագրով» նախատեսված հիմնական աշխատանքները: Կվերականգնվեն մոտ 50 կմ երկարությամբ մայր և միջտնտեսային ջրանցքներ Արագածոտնի, Կոտայքի, Շիրակի, Լոռու, Արարատի ու Արմավիրի մարզերում և մոտ 63 կմ երկարությամբ ներտնտեսային ոռոգման ցանցի ջրանցքներ Լոռու, Շիրակի, Գեղարքունիքի և Արմավիրի մարզերում:

ՎԶԵԲ-ի կողմից ֆինանսավորվող «Սևանա լճի բնապահպանական ծրագրի» շրջանակում կավարտվեն Գավառ, Մարտունի և Վարդենիս քաղաքների կոյուղաջրերի մաքրման կայանների կառուցման, ինչպես նաև կոյուղացանցերի վերանորոգման աշխատանքները: Կմեկնարկեն Ջերմուկ և Դիլիջան քաղաքներում կոյուղու մաքրման կայանների կառուցման աշխատանքները: Գերմանական KfW բանկի ֆինանսավորմամբ աշխատանքներ կիրականացվեն Կապսի ջրամբարի վերականգնման ուղղությամբ։

Կշարունակվեն նաև ջրային տնտեսության ոլորտի ընկերությունների և ջրային համակարգերի կառավարման բարեփոխումները:

Համակարգի բնականոն աշխատանքի ապահովման տեսանկյունից փոխվարչապետը կարևորեց ոլորտում հավաքագրումների պատշաճ մակարդակով իրականացումը: Նա դժգոհություն հայտնեց «Թալին» և «Քարակերտ» ՋՕԸ-երի աշխատանքների արդյունքներից՝ հատկապես հավաքագրումների առումով, և հորդորեց մյուս ՋՕԸ-երում՝ մասնավորապես «Մասիս» ՋՕԸ-ում, աշխատանքներն առավել արդյունավետ կազմակերպել:

Ա.Գևորգյանը նշեց, որ ոլորտում այս տարի ևս մի շարք կարևոր ծրագրեր են իրագործվում միջազգային ֆինանսական կազմակերպությունների աջակցությամբ և ընդգծեց դրանց արդյունավետ ու որակով իրականացումը։

Խորհրդակցության ընթացքում որոշվեց, որ Ջրային տնտեսության զարգացման և բարեփոխումների ԾԻԳ-ը սեղմ ժամկետներում փոխվարչապետին կներկայացնի ոռոգման ջրի դիմաց 50 հազար դրամից ավելի պարտք ունեցող շահառուների ցուցակը՝ ըստ համայնքների:

Առաջարկվեց ուշադրություն դարձնել «ՀՄՀ-Հայաստան»-ի ծրագրերով վերականգնված կառույցների հանձնման և ընդունման գործընթացին, ինչպես նաև հետերաշխիքային ժամկետում իրականացվող աշխատանքներին:

Պայմանավորվածություն ձեռք բերվեց ոռոգման համակարգի ընեկերությունների հետ ավանդական հանդիպում-քննարկումը փետրվարի սկզբին կազմակերպելու վերաբերյալ:

Տարածքային կառավարման նախարարության հասարակայնության հետ կապերի բաժին