«Արմենիա միջազգային օդանավակայաններ» ՓԲԸ-ին՝ հայտարարության փոխարեն հրապարակեք բաժնետերերի անունները
Երեկ «Արմենիա միջազգային օդանավակայաններ» ՓԲԸ-ն տարածել է հետեւյալ հայտարարությունը.
«Վերջերս հայաստանյան որոշ լրատվամիջոցներ լուրեր են տարածել, որ Հայաստանի երկրորդ նախագահ Ռոբերտ Քոչարյանը բաժնեմաս ունի «Զվարթնոց» միջազգային օդանավակայանում: Այդ տեղեկատվությունը Ռոբերտ Քոչարյանն անձամբ հերքել է վերջերս տված իր հարցազրույցում:
«Արմենիա միջազգային օդանավակայաններ» ՓԲԸ-ն ցանկանում է հստակեցնել, որ հանդիսանում է բաց և թափանցիկ ընկերություն, որը հարյուրավոր միլիոն դոլարների ներդրումներ է իրականացրել Հայաստանի տնտեսության մեջ, ինչը վերջին երկու տասնամյակների ընթացքում նպաստել է Հայաստանի կայուն զարգացմանը:
Ռոբերտ Քոչարյանը մեր ընկերությունում որևէ բաժնեմաս չունի և երբևէ չի էլ ունեցել: «Արմենիա միջազգային օդանավակայաններ» ՓԲԸ-ն պատրաստ է այս փաստը հաստատելու համար իր հաշվապահական հաշվառման գրքերը և գրանցումները տրամադրել մանրամասն աուդիտ իրականացնելու համար»։
Ընկերությունը այս հայտարարությունն արել է «Հետքի» հարցումից հետո։ Սակայն մեր հարցմանը պատասխանելու փոխարեն «Արմենիա միջազգային օդանավակայաններ» ՓԲԸ-ն որոշել է տարածել այս հայտարարությունը։
Հայտարարության մեջ, թերեւս, մի կոպիտ սխալ կա. այնտեղ նշված է, որ վերջերս որոշ լրատվամիջոցներ գրել են, որ երկրորդ նախագահ Ռոբերտ Քոչարյանը բաժնեմաս ունի ընկերությունում։ Այս մասին գրվել է ոչ թե «վերջերս», այլ վերջին 10 տարիներին պարբերաբար, եւ երբեւէ այդ տարիների ընթացքում ընկերությունը չի հերքել այդ տեղեկատվությունը։
Հայաստանի օրենսդրությամբ ՓԲԸ-ների բաժնետերերի տվյալները հնարավոր է ձեռք բերել միայն բաժնետերերի համաձայնության դեպքում։
Քանի որ «Արմենիա միջազգային օդանավակայաններ» ՓԲԸ-ն պատրաստակամություն է հայտնել ամեն կերպ աջակցել երկրորդ նախագահ Ռոբերտ Քոչարյանի` բաժնեմաս չունենալու փաստը հաստատելու համար, առաջարկում ենք տալ համաձայնություն Կենտրոնական դեպոզիտարիատին` հրապարակելու ընկերության բաժնետերերի անունները:
Բացեք «Արմենիա միջազգային օդանավակայաններ» ՓԲԸ-ի եւ «Զվարթնոց Հենդլինգ» ՓԲԸ-ի փաստաթղթերը եւ հրապարակեք բաժնետերերի անունները:
Մեկնաբանել