Սարհատ Պետրոսյան. «Կադաստրը ժեկից տարբերվում է, և շատ լուրջ պետական գործառույթներ ունի»
Անշարժ գույքի կադաստրի կոմիտեն մշակել է առաջիկա հինգ տարիների ծրագիրը: Կոմիտեի ղեկավար Սարհատ Պետրոսյանի բնորոշմամբ` հավակնոտ առաջադրանքներ են ձևակերպվել: «Այդ կետերից մեկն առցանց, ինքնաշխատ, այսպես ասած՝ անթուղթ Կադաստրի ստեղծումն է, որպեսզի մարդիկ «չիմանան» Կադաստրի տեղը»,- այսօր Կոմիտեում հրավիրած առաջին թռուցքաժողովում ասել է նորանշանակ ղեկավարը եւ հավելել, որ այդ խնդիրները վերաբերում են բոլորին, այդ թվում՝ անձամբ իրեն։
Ծրագիրն առաջիկայում կհրապարակվի։
Համակարգի առջև աշխատանքային երեք և քաղաքական (ավելի շուտ՝ ապաքաղաքական) մեկ խնդիր է դրել Սարհատ Պետրոսյանը։ Առաջինն արդար և ազնիվ աշխատելու խնդիրն է:
«Ազնվության նշաձողը շատ բարձր է լինելու, հաշվի´ առեք, որ կոռուպցիան միայն կաշառակերությունը չէ»,- ասել է Պետրոսյանը՝ ավելացնելով, որ որևէ կերպ չի հանդուրժելու նաև շահերի բախումը՝ «խնամի-ծանոթ-բարեկամ» գործարքները ոչ միայն համակարգի ներսում, այլև տարբեր ընկերությունների հետ համագործակցելիս:
«Յուրաքանչյուր աշխատող թանկ է ինձ համար և պատրաստ եմ սատարել, բայց մեր առջև դրված խնդիրները չկատարողը հրաժեշտ կտա այս աշխատանքին»,-նշված է Կոմիտեի կայքում հրապարակված հաղորդագրության մեջ։
Համակարգի առջև դրված երկրորդ խնդիրը պրոֆեսիոնալիզմն է. « 90-ականներին երկրի ամենապրոֆեսիոնալ կերպով հիմնադրված կառույցներից էր այս Կոմիտեն, 2010-ականներին՝ լավագույնս բարեփոխումներ իրականացրածների։ Սկսում ենք երրորդ սերնդի փոփոխությունները՝ ամենաբարձր պրոֆեսիոնալիզմով աշխատանքը»։
Կոմիտեի ղեկավարի ներկայացրած երրորդ խնդիր-պահանջը թիմային աշխատանքն է և նվիրվածությունը։
«Չեմ կարող ասել, թե ձեզանից յուրաքանչյուրը որքանով է բավարարված իր աշխատավարձի չափով, բայց ձեզ տրված է որևէ բան փոխելու պատմական հնարավորություն, և անպայման պետք է լավագույնս օգտվեք այդ հնարավորությունից»։
Քանի որ սա առաջին թռուցքաժողովն էր, Պետրոսյանը փոխանցեց, որ հաջորդներին անպայման սպասում է բազմակողմ քննարկումներ: «Իսկ այդ 3 չափորոշիչների կատարումը կամ չկատարումը ոչ մի կերպ չի կարող վրիպել իմ աչքից, և որևէ կերպ կաշկանդված չեմ. անփոխարինելի մարդիկ չկան»,- հայտարարել է նա։
Կազմակերպական և կարգապահական ներքին խնդիրները ձևակերպելուց հետո Կոմիտեի ղեկավարն անդրադարձել է քաղծառայության՝ ապաքաղաքական լինելու սկզբունքը խստորեն պահպանելու պահանջին. «Ընտրությունների վերաբերյալ ինձանից որևէ քաղաքական հայտարարության չսպասե՛ք։ Ավելին, եթե որևէ մեկը մեր համակարգում փորձի այդ նպատակով օգտագործել իր պաշտոնեական, աշխատանքային դիրքը, ամենախիստ պատժի կենթարկվի՝ ո´ր ուժի օգտին էլ լինի»։
Առաջիկայում նորովի կկազմակերպվի Կոմիտեի գործունեության լուսաբանումը, շուտով կհայտարարվի «Նոր կադաստրի» տարբերանշանի մրցույթը, բացվել է Ֆեյսբուքի էջը, կարվեն այլ նորամուծություններ ևս:
«Շատ խնդիրներ ունենք լուծելու այս տեսանկյունից. մարդիկ պետք է իմանան, որ Կադաստրը ժեկից տարբերվում է, և շատ լուրջ պետական գործառույթներ ունի»,-թռուցքաժողովը եզրափակել է Սարհատ Պետրոսյանը։
Մեկնաբանություններ (1)
Մեկնաբանել