Օրենսդրորեն կկարգավորվեն Հայաստան անօրինական տեղափոխված կամ ապօրինի պահվող երեխայի վերադարձի հարաբերությունները
Հայաստանի Հանրապետության արդարադատության նախարարի տեղակալ Սուրեն Քրմոյանի գլխավորությամբ օգոստոսի 5-ին Միջազգային իրավական համագործակցության գերմանական հիմնադրամի (IRZ) փորձագետների հետ տեղի է ունեցել Հաագայի՝ երեխաների առևանգման կոնվենցիայի իրականացման և կիրառման համար մշակված համապատասխան օրենքի նախագծի շուրջ քննարկում:
Նախարարությունը տեղեկացնում է, որ քննարկմանը մասնակցել են Գերմանիայի Դաշնության Համմի առաջին ատյանի դատարանի դատավոր Մարտինա Էրբ-Քլյունեմանը, Հայաստանի ԱՆ քաղաքացիական կացության ակտերի գրանցման գործակալության պետ Անի Մխիթարյանը, Գերմանիայի արդարադատության դաշնային ծառայութան, Միջազգային խնամակալության, երեխաների առևանգման, երեխաների և չափահասների պաշտպանության 113 վարչության պետ Քրիստիան Հյոնը, Հայաստանի ԱՆ միջազգային իրավական համագործակցության վարչության պետ Քրիստիննե Գրիգորյանը, օրենքի նախագծի մշակման աշխատանքային խմբի անդամները:
«Երեխաների առևանգման հարցերը այն կարևոր խնդիրներն են, որոնք այսօր միջազգային հանրությունը կարգավորել է համապատասխան միջազգային իրավական գործիքների միջոցով: Հայաստանում նույնպես Կոնվենցիայի հիման վրա գործում են մարմիններ, այդուհանդերձ, գործնական մի շարք խնդիրների պատճառով մենք որոշել ենք փոխել այս օրենսդրությունը: Հիմնական խնդիրը կայանում էր նրանում, որ առևանգված երեխային վերադարձնելու կամ չվերադարձնելու որոշումը ընդունում էր վարչական մարմինը և ոչ դատարանը: Պաշտպանված չէր անձի դատական պաշտպանության իրավունքը, բացի դրանից դատական որոշման բացակայությունը թույլ չէր տալիս նաև Հարկադիր կատարման ծառայությանը ներգրավել այդ գործընթացում»- ասել է փոխնախարար Քրմոյանը:
Գործակալության պետ Անի Մխիթարյանը, օրենքի մշակման աշխատանքային խմբի փորձագետ Տաթևիկ Սարուխանյանը գերմանացի փորձագետներին են ներկայացրել նոր օրենսդրությամբ նախատեսվող մի շարք դրույթներ և անդրադարձել Հայաստան անօրինական տեղափոխված կամ Հայաստանում ապօրինի պահվող երեխայի վերադարձի ընթացակարգերին, Հայաստանի կառավարության կողմից որոշված կենտրոնական մարմնի և իրավասու այլ պետական ու տեղական ինքնակառավարման մարմինների համագործակցության հետ կապված հարաբերությունների համապարփակ իրավական կարգավորմանը, ինչպես նաև նոր օրենքով նախատեսված մի շարք մեխանիզմների կիրառմանը:
Դատավոր Մարտինա Էրբ-Քլյունեմանը և Գերմանիայի արարադատության դաշնային ծառայութան, Միջազգային խնամակալության, երեխաների առևանգման երեխաների և չափահասների պաշտպանության 113 վարչության պետ Քրիստիան Հյոնը ողջունել են հայ գործընկերներին և նկատել, որ մի շարք դրական և տեսանելի փոփոխություններ են կատարվել համապատասխան օրենսդրության մեջ, ինչը թույլ է տալիս ասել, որ Հայաստանը ճիշտ ուղի է ընտրել:
Մեկնաբանել